این ایل سی: جدید لاجسٹک فلیٹ کے ساتھ علاقائی تجارت کو فروغ
ہالینڈ(ڈیلی روشنی نیوز انٹرنیشنل )نیشنل لاجسٹک کارپوریشن (این ایل سی) نے علاقائی ممالک کے ساتھ بڑھتی ہوئی تجارت کے جواب میں اپنے لاجسٹک بیڑے میں 500 جدید اور اعلیٰ طاقت والے ٹرک شامل کر لیے ہیں۔ یہ ٹرک طویل فاصلے کے آپریشنز کے لیے ڈیزائن کیے گئے ہیں اور خنجراب پاس کے ذریعے پاکستان لائے گئے، جس سے سمندری نقل و حمل کے مقابلے میں وقت اور اخراجات کی بچت ہوئی۔
یہ اقدام “علاقائی رابطے” کو مضبوط کرنے کے لیے لیا گیا ہے، جو TIR (دی انٹرنیشنل روڈ ٹرانسپورٹ) کے تحت 2021 میں شروع کیے گئے پہلے کمرشل آپریشن کا تسلسل ہے۔ این ایل سی نے اپنی زمینی نقل و حمل کو وسطی ایشیائی ممالک، چین، روس، ترکی، آذربائیجان اور دیگر ممالک تک توسیع دی ہے، جبکہ مشرقی یورپ تک پہنچنے کے منصوبے بھی جاری ہیں۔
390 ہارس پاور کے حامل یہ جدید ٹرک طویل فاصلے کی نقل و حمل کے تقاضوں کو پورا کرنے کی صلاحیت رکھتے ہیں اور مختلف مقامات تک سامان کی ترسیل میں استعمال ہوں گے۔
ان جدید ٹرکوں کی شمولیت این ایل سی کی کراس بارڈر لاجسٹک صلاحیتوں کو مزید بڑھائے گی اور علاقائی تجارت و رابطوں کے فروغ میں اہم کردار ادا کرے گی۔
