دنیا بھر کی طرح یونان میں بھی شیخ الاسلام ڈاکٹر محمد طاہر القادری کے والد گرامی فرید ملت ڈاکٹر  فرید الدین قادری کے عرس مبارک کو انتہائی عقیدت سے منایا گیا

ایتھنز : یونان(ڈیلی روشنی نیوز انٹرنیشنل ۔۔۔رپورٹ ۔۔۔انصر اقبال بسراء )منہاج القرآن انٹرنیشنل یونان کے زیراہتمام منہاج اسلامک سنٹر ایتھنز میں فرید ملت ڈاکٹر فرید الدین قادریؒ کے 52 ویں سالانہ عرس مبارک کی مناسبت سے ایک روح پرور محفل نعت کا انعقاد کیا گیا۔

اس با برکت محفل میں یونان بھر سے ثناخوانوں، علمائے کرام، سیاسی و سماجی شخصیات، صحافی برادری، کمیونٹی رہنماؤں اور منہاج القرآن کے کارکنان کی بڑی تعداد نے شرکت کی۔ محفل کا آغاز تلاوتِ کلامِ پاک سے ہوا، جس کی سعادت حافظ عدیل نے حاصل کی، بعد ازاں ثناخوانوں نے بارگاہِ رسالت مآب ﷺ میں عقیدت کے پھول نچھاور کیے۔نظامت کے فرائض انصر اقبال بسراء ترجمان منہاج القران یونان نے بڑے احسن انداز میں ادا کیے ۔

اس موقع پر مقررین نے ڈاکٹر فرید الدین قادریؒ کی دینی، علمی، سماجی اور تحریکِ پاکستان کے لیے گراں قدر خدمات کو زبردست خراج تحسین پیش کیا۔ انہوں نے کہا کہ ڈاکٹر فرید ملتؒ نے نہ صرف ایک عظیم روحانی اور علمی ورثہ چھوڑا بلکہ ان کی تربیت یافتہ نسل آج بھی دنیا بھر میں اسلام کی امن و محبت پر مبنی تعلیمات کو فروغ دے رہی ہے۔

آخر میں صدر منہاج القرآن یونان ارسلان خرم چیمہ نے تمام معزز مہمانوں، شرکاء اور خصوصاً صحافی برادری کا شکریہ ادا کرتے ہوئے کہا کہ ڈاکٹر فرید ملتؒ کے افکار اور خدمات کو زندہ رکھنا ہم سب کی ذمہ داری ہے۔محفل کے اختتام پر  امت مسلمہ، بالخصوص پاکستان، فلسطین اور کشمیر کی سلامتی کے لیے خصوصی دعائیں کی گئیں۔