سائنسدانوں نے دنیا کا سب سے چھوٹا پیس میکر تیار کرلیا

ہالینڈ(ڈیلی روشنی نیوز انٹرنیشنل )سائنسدانوں نے امراض قلب کے شکار افراد کے لیے دنیا کا سب سے چھوٹا پیس میکر تیار کیا ہے۔

یہ اتنا چھوٹا ہے کہ کسی سرنج کے سرے کے اندر بھی فٹ ہوسکتا ہے۔

یعنی اسے انجیکشن کے ذریعے بھی جسم کے اندر داخل کیا جاسکتا ہے اور مریضوں کو تکلیف دہ طویل سرجری کی ضرورت نہیں ہوگی۔

امریکا کی نارتھ ویسٹرن یونیورسٹی کے ماہرین نے اس پیس میکر کو تیار کیا ہے۔

انہوں نے بتایا کہ یہ جسم میں کچھ عرصے رہنے کے بعد خون میں تحلیل ہو جاتا ہے تو یہ ایک عارضی حل ہے۔

اسے ایسے مریضوں کے لیے ڈیزائن کیا گیا ہے جن کے دل کو مختصر المدت کے لیے مدد کی ضرورت ہوتی ہے، جیسے دل کے مسائل کے شکار نومولود بچے۔

مگر ااسے ہر عمر کے افراد کے لیے بھی استعمال کیا جاسکتا ہے۔

اسے روشنی سے توانائی ملتی ہے جو کہ زیادہ متاثر کن پیشرفت ہے۔

اس پیس میکر کو ایسی وائرلیس وئیر ایبل ڈیوائس سے منسلک کیا جاسکتا ہے جو مریض کے سینے پر لگائی جاسکتی ہے۔

جب اس چھوٹی ڈیوائس کو دل کی دھڑکن میں بے ترتیبی کا علم ہوتا ہے تو اس پر ایک لائٹ چمکنے لگتی ہے جس سے پیس میکر متحرک ہو جاتا ہے۔

ڈیوائس کی روشنی مریض کی جِلد، ہڈیوں اور مسلز سے گزرنے کی صلاحیت رکھتی ہے۔

اگرچہ یہ پیس میکر بہت چھوٹا ہے اور اس کی موٹائی ایک ملی میٹر کے قریب ہے مگر یہ کسی بڑے پیس میکر جتنا ہی کام کرسکتا ہے۔

ویب ڈیسک