ماہم حیا صفدر کا شعری مجموعہ ” عطش “، تاثرات : آرسی رؤف
ہالینڈ(ڈیلی روشنی نیوز انٹرنیشنل )ماہم حیا صفدر نو عمر ابھرتی ہویٔ شاعرہ یوں تو اب کسی تعارف کی محتاج نہیں رہیں،لیکن انکی کتاب عطش جو چھپ کر ہماری شیلفوں کی زینت بن چکی ہے۔جب سے کتاب میرے ہاتھ آیٔ ہے اس پر تبصرہ کرنے کی خواہاں تھی،کچھ ناگزیر وجوہات آڑے آتی رہیں۔
ایک سو چوالیس صاحات پر مبنی کتاب،عطش، کے سر ورق پر نظر پڑتے ہی یوں محسوس ہوا جیسے کسی لق و دق صحرا میں محو سفر ہو گیٔ ہوں،سورج سوا نیزے پر موجود ہے،حلق میں شدت پیاس سے کانٹے سے اگ آئے ہیں اور میں ایک جراعہ پانی کے لیے پیادہ چل پڑی ہوں۔
شاعرہ کے نام اور اس کی تخلیقات سے متعلق مبصرین کے تبصرے پڑھے تو یہ نو عمر شاعرہ قد کاٹھ میں طویل القامت ہوتی چلی گیٔ،اپنی وسعت نظر کی اسیر کرنے لگی۔سو خود کو بھی شاعرہ کے ساتھ ساتھ تشنگی و تڑپ ،جس میں وارفتگی اور والہانہ پن کی کویٔ کمی نہیں تھی،محو سفر پایا۔آغاز سفر میں تشنہ لبی کی تشفی کے لیے حمدیہ کلام کی پھوار روح پر بوند بوند گرنے لگی،لیکن تشنگی کچھ اور بڑھی،،تڑپ سوا ہویٔ اور نعتیہ کلام کی طرف بھی دل ہمکنے لگا۔حمدیہ کلام کے ہر شعر کا پہلا مصرعہ جہاں خدا کی ربوبیت کو تسلیم کر کے سر تسلیم خم کرنے پر مجبور کرتا رہا،وہیں ہر دوسرا مصرعہ اس سے جڑے اٹوٹ تعلق کو مضبوط تر بناتا رہا۔
تجھ سے ہی آس ہے کہ بچا ئے گا اس کو تو مشکل میں پھنس گیا ہے جو اک بے نوا تیرا
چار خوبصورت نعتوں میں شاعرہ عجزو انکساری کے ساتھ دل ونظر فرش راہ کیے ،اپنےآپ پر تخیل کی ندرت میں ،لفظوں کی فراوانی کو،اپنی نعت گوئی کافیضان قرار دیتی ہے ۔وہ دل کو دل نہیں ،ٹھکانہ محمد قرار دیتی ہے۔شہداۓ کرب و بلا کو لفط لفظ سلام پیش کرتی حضرت عمر فاروق کی منقبت بیان کرتی ہے تو ان کے رعب و دبدبے،حیا،عدل،وسیع القلبی اور وسعت نظر کا وہ نقشہ کھینچتی ہے کہ روح شانت کر دے۔
کرتے تھے وہ پکڑ سب امرائے بد کی بھی
دیکھا کسی نے ایسا کویٔ منصفین میں
حصہ غزل میں اڑتالیس غزلیں شامل ہیں۔انکی شاعری میں کلاسیکیت اور ندرت کا ایک حسین امتزاج موجود ہے۔غزل کا ہر شعر ہی ایک نیا موضوع لیے ہوئے ،کبھی زمینی حقایٔق کے پرت کھولتا،اور کبھی آسمانی وسعتوں کو بیان کرتا ہوا،کبھی خوابوں کو تکیے تلے رکھے،کبھی اندھیرے چوم کر طاقوں میں رکھ لیے،اور پھر میر اور جون کے اشعار کی رسیا دکھایٔ دی۔ بہ یک وقت بے باک،نڈر اور وفا شعارانہ نسایٔ عنصر لیے ہوۓ مثلاً
دست صنم کو زحمت دستک تلک نہ ہو ہم نے تو حیا رکھ دیا ہے در اتار کر اس بے باکی اور برملا پن کے باوجود اشعار میں نفاست اور اور پاکیزگی کا پہلو نمایاں ہے،ملاحظہ ہو
تو میرا دوست ہے یہ بھول گیا کیونکر تو؟
زیب دیتا ہے تجھے مجھ سے گریزاں ہونا؟
یا پھر
اے مسیحاؤ تردد نہ کرو کویٔ بھی
اب تو خوش فیمی سے بیمار نکل آیا ہے
استعارات میں معاشرتی بگاڑ اور بد عنوانیوں کا تزکرہ سہل الفاظ میں یوں کر دیا کہ بات سماعتوں سے اترے اور بازگشت دور تک دماغ کی شریانون میں سنایٔ دے۔بطور نمونہ
دربار شاہی میں کہان جایٔں گی عرضیاں
ممکن ہے تبی جب سپاہی اجازت دے ، یا
ہم کاغذات لائے تھے سبھی دستخط شدہ
قانون سارے وہ زبانی بدل گیا ،
ہم ہی شاید خطا کے پتلے ہوں آپ سے کب ذہول ہوتے ہیں
تصور محبوب کسی ہم پلہ و ہم قامت شخص کا ہے۔دو بہ دو محبوب کی توصیف ہو یا تنقید،جھجھک موجود نہیں،کیا خوب کہ
دوہی منظر ہیں جہاں بھر میں نظارے لایٔق
ترا ہنسنا یا میری زلف کا پیچاں ہونا
حصہ نظم میں سینتیس نظمیں شامل ہیں۔جن میں آذاد،معری اور نثری نظمیں شامل ہیں۔محبوب کا ملنے نہ آنا۔۔۔۔۔۔۔۔ موسم کی سازش ہے۔۔۔۔۔۔۔ اور پھر
،تم جب ملنے آتے ہو
ڈھیر اداسی دے جاتے ہو۔
لیکن آتش پر سوز میں سلگتا بدن ہونے کے باوجود،امید،باندھ کر
اک کپ چائے
آدھی آدھی پی لیتے ہیں، کی خواہش،حقیقی بشر ہونے کا پورا پورا ثبوت فراہم کرتی ہے۔
نثری نظم کاہر ہر لفظ خیال کے تانوں بانوں کو کسی گتھی کی طرح سلجھاتا ہوابالآخر اختتام پر پہنچ کرمکمل داستان رقم کر دیتا ہے۔قاری نگاہ تک اتھا لینے سے قاصڑ،کہ لفظ چھوٹ گیا تو خیال تانا بانا ایک دوسرے میں گڈ مڈ ہو جائے گا،اور یوں دم لیے بغیر تکمل کا سفر طے کر لیتا ہے۔ نظم طمانچہ میں محبت کے سب رنگوں جن میں محبت،سرخرو ہویٔ،اختتام کے قریب پہنچ کر پتہ چلتا ہی ان سب تخیلاتی کہانیوں میں،اصل مرد،حقیقی مردوں سے بہت مختلف ہیں،ہمارے معاشرے کا ایسا سچ ہے جس پر قلم اٹھا کر قلم کا حق ادا کر دیا گیاہے۔
گویا زیر نظر شعری مجموعہ” عطش” ماہم حیا صفدر کی تخیلاتی کاوشوں کا ایسا مجموعہ ہے جس میں زیست ہر رنگ ایک خاص تناسب میں بیان کردہ ہے۔ان کا تخیل حیرت کدہ میں پہنچا دیتا ہے تو کبھی فلسفیانہ انداز فکر،سوچ کے کیٔ در وا کرتا ہے۔وہ اپنے قاری کو مایوس کیے بغیر اپنے سنگ رواں دواں رکھے آخری صفحے تک لے آتی ہیں،لیکن معلوم سے نامعلوم کی طرف جہد مسلسل میں اپنے دل میں موجود ،عطش ، کو آتش عشق کی طرح بجھنے نہیں دیتیں کہ یہی عطش تلاش کے سفر میں دور تک ان کی ہم سفر ہے اور دعاؤں میں لپٹی ،اک بد دعا
تجھ کو بھی خدا اایسے ہی راہ سے گزارے اک دن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔مری جان سے پہلے
تیرا دل جائے
یوں دونوں کا نقصان برابر ہو جائے ۔۔۔۔۔۔۔۔۔۔۔۔۔۔
جو درپردہ بھی دعا ہی ہے،ان کو ساکن و جامد ہونے سے بچاتی ہے۔
