۔۔۔۔۔۔۔۔ غزل ۔۔۔۔۔۔۔۔۔
محبتوں کا سفر
شاعر ۔۔۔۔۔۔۔۔۔ شہزاد تابش
محبتوں کے سفر رائیگاں نہیں ہوتے
جو ساتھ چلتے ہوئے بدگماں نہیں ہوتے
اسی جہان میں جیتے ہیں زندگی اپنی
وہ جن کے سر پہ کبھی آسماں نہیں ہوتے
سفر سے پہلے ذرا سوچ لے پری پیکر
کہ راہ عشق میں منزل نشاں نہیں ہوتے
مرا وجود بکھرتا نہ آئینے کی طرح
جو پتھروں کے نگر درمیاں نہیں ہوتے
یہی سوال ہے الفت کے دیوتا سے مرا
وفا کی راہ میں کانٹے کہاں نہیں ہوتے
ہر اک وجود کی نسبت ہے خاکدانوں سے
نہیں جو آپ تو ہم بھی یہاں نہیں ہوتے
کروں تو کیسے میں تفسیر غم کے ماروں کی
کچھ ایسےدکھ ہیں جومجھ سے بیاں نہیں ہوتے
ہے پنچھیوں سے لگاوٹ اسی لیے تابشِ
مری طرح کہیں ان کے مکاں نہیں ہوتے
شہزاد تابشِ
لاھور
پاکستان
