آج اردو کے مہان ادیب، پنجابی شاعر اور فلمی نغمہ نگار احمد راہی کا یوم وفات ہے۔

ہالینڈ(ڈیلی روشنی نیوز انٹرنیشنل ) آج اردو کے مہان ادیب اور “پنجابی دے منّے پرمنّے” شاعر و فلمی نغمہ نگار احمد راہی کا یوم وفات ہے، 12 نومبر 1923 کو امرتسر کے ایک کشمیری خاندان میں ہیدا ہونے والے احمد راہی کا اصل نام غلام احمد تھا، امرتسر میں سعادت حسن منٹو، سیف الدین سیف اور اے حمید ان کے دوستوں میں شامل تھے۔

تقسیم برصغیر کے بعد 24 برس کی عمر میں احمد راہی لاہور آئے تو موقر ادبی جریدے ‘سویرا’ کے مدیر بنے۔ 1953 میں ان کے پہلے شعری مجموعے ‘ترنجن’ کی اشاعت پنجابی ادب کی تاریخ میں ایک اہم واقعہ سمجھا جاتا ہے۔ اس وقت تک پنجابی کے بارے میں تاثر تھا کہ نازک احساسات اور جذبات کے اظہار کے لیے یہ زبان موزوں نہیں ہے لیکن احمد راہی نے ‘ترنجن’ کے ذریعے اس تاثر کو زائل کر دیا اور ان کا شمار جدید پنجابی نظم کے بانیوں میں ہونے لگا۔

‘ترنجن’ کی نظموں میں تقسیم ہند کے وقت ہونے والے فسادات میں عورتوں کے ساتھ مظالم کو دلگداز انداز میں پیش کیا گیا۔ اس مجموعے کا فلیپ سعادت حسن منٹو نے احمد راہی کی فرمائش پر پنجابی میں لکھا، یہ سعادت حسن منٹو کی اکلوتی پنجابی تحریر ثابت ہوئی۔

احمد راہی کے ‘ترنجن’ کے بعد آنے والے اردو اور پنجابی مجموعے ‘رت آئے رت جائے’، ‘رگِ جاں’، ‘نمی نمی وا’ ہیں۔ احمد راہی نے پنجابی فلموں کے لیے شاندار گیت لکھے۔ فلمی کیرئیر کا آغاز پنجابی فلم ‘بیلی’ سے کیا جو تقسیم کے وقت ہونے والے فسادات کے پس منظر میں بنائی گئی تھی۔ اس فلم کی کہانی مشہور افسانہ نگار سعادت حسن منٹو نے لکھی جب کہ ہدایات مسعود پرویز نے دیں۔ ‘بیلی’ کے لیے احمد راہی نے چار گیت لکھے۔ انہوں نے مسعود پرویز اور خواجہ خورشید انور کی مشہور پنجابی فلم ‘ہیر رانجھا’ کے لیے بھی نغمات لکھے جن میں “سن ونجھلی دی مٹھڑی تان” اور “ونجھلی والڑیا توں تے موہ لئی اے مٹیار” آج بھی اپنا جادو جگاتے ہیں-

احمد راہی نے جن دوسری فلموں کے لیے نغمات تحریر کیے ان میں ‘شہری بابو’، ‘ماہی منڈا’، ‘پینگاں’، ‘چھومنتر’، ‘یکے والی’، ‘پلکاں’، ‘گڈو’، ‘سہتی’، ‘یار بیلی’، ‘مفت بر’، ‘رشتہ’، ‘مہندی والے ہتھ’، ‘بھرجائی’، ‘اک پردیسی اک مٹیار’، ‘وچھوڑا’، ‘باڈی گارڈ’، ‘قسمت’، ‘ہیر رانجھا’، ‘مرزا جٹ’، ‘سسی پنوں’، ‘نکے ہوندیاں دا پیار’، ‘ناجو’ اور ‘دل دیاں لگیاں’ شامل ہیں۔ انہوں نے کئی اردو فلموں کے لیے بھی منظر نامہ، مکالمے اور گانے لکھے جن میں ‘یکے والی’، ‘آزاد’، ‘کلرک’ اور ‘باجی’ شامل ہیں۔

جب گجر اور جٹ ٹائپ فلموں کا ‘تاریک’ دور پاکستانی فلم انڈسٹری میں آیا اور ملکہ ترنم نور جہاں تک “ویل دی قمیض۔۔۔۔” تک اتر آئیں تو احمد راہی نے بد دل ہو کر فلمی دنیا سے کنارہ کشی اختیار کر لی۔ کبھی کبھار کوئی پروڈیوسر رابطہ کرتا تو کہہ دیتے کہ ایسے لوگوں کے ساتھ وہ کام نہیں کر سکتے۔ فلمی دنیا کی رونقوں سے دوری کے ساتھ خراب صحت کی وجہ سے دوستوں سے ملنا جلنا بھی بہت کم رہ گیا تو شدید اداسی میں مبتلا ہو گئے۔ احمد راہی کی اداس زندگی کا اختتام 2 ستمبر 2002 کو ہوا۔

|منتخب کلام|

کوئی ماضی کے جھروکوں سے صدا دیتا ہے

سرد پڑتے ہوئے شعلوں کو ہوا دیتا ہے

دل افسردہ کا ہر گوشہ چھنک اٹھتا ہے

ذہن جب یادوں کی زنجیر ہلا دیتا ہے

حال دل کتنا ہی انسان چھپائے یارو

حال دل اس کا تو چہرہ ہی بتا دیتا ہے

کسی بچھڑے ہوئے کھوئے ہوئے ہم دم کا خیال

کتنے سوئے ہوئے جذبوں کو جگا دیتا ہے

ایک لمحہ بھی گزر سکتا نہ ہو جس کے بغیر

کوئی اس شخص کو کس طرح بھلا دیتا ہے

وقت کے ساتھ گزر جاتا ہے ہر اک صدمہ

وقت ہر زخم کو ہر غم کو مٹا دیتا ہے

٭٭٭٭٭٭٭٭٭

دن گزرتا ہے کہاں رات کہاں ہوتی ہے

درد کے ماروں سے اب بات کہاں ہوتی ہے

ایک سے چہرے تو ہوتے ہیں کئی دنیا میں

ایک سی صورت حالات کہاں ہوتی ہے

زندگی کے وہ کسی موڑ پہ گاہے گاہے

مل تو جاتے ہیں ملاقات کہاں ہوتی ہے

آسمانوں سے کوئی بوند نہیں برسے گی

جلتے صحراؤں میں برسات کہاں ہوتی ہے

یوں تو اوروں کی بہت باتیں سنائیں ان کو

اپنی جو بات ہے وہ بات کہاں ہوتی ہے

جیسی آغاز محبت میں ہوا کرتی ہے

ویسی پھر شدت جذبات کہاں ہوتی ہے

پیار کی آگ بنا دیتی ہے کندن جن کو

ان کے ذہنوں میں بھلا ذات کہاں ہوتی ہے

٭٭٭٭٭٭٭٭٭

اشعار

۔۔۔۔۔

میں تو مسجد سے چلا تھا کسی کعبہ کی طرف

دکھ تو یہ ہے کہ عبادت مری بد نام ہوئی

٭٭٭٭٭٭٭٭٭

کہیں یہ اپنی محبت کی انتہا تو نہیں

بہت دنوں سے تری یاد بھی نہیں آئی

٭٭٭٭٭٭٭٭٭

خشک خشک سی پلکیں اور سوکھ جاتی ہیں

میں تری جدائی میں اس طرح بھی روتا ہوں

٭٭٭٭٭٭٭٭٭

زندگی کے وہ کسی موڑ پہ گاہے گاہے

مل تو جاتے ہیں ملاقات کہاں ہوتی ہے

٭٭٭٭٭٭٭٭٭

مرے حبیب مری مسکراہٹوں پہ نہ جا

خدا گواہ مجھے آج بھی ترا غم ہے

٭٭٭٭٭٭٭٭٭

ہر ایک بات کے یوں تو دیے جواب اس نے

جو خاص بات تھی ہر بار ہنس کے ٹال گیا

٭٭٭٭٭٭٭٭٭

جس طرف جائیں جہاں جائیں بھری دنیا میں

راستہ روکے تری یاد کھڑی ہوتی ہے

٭٭٭٭٭٭٭٭٭

میں سوچتا ہوں زمانے کا حال کیا ہوگا

اگر یہ الجھی ہوئی زلف تو نے سلجھائی

٭٭٭٭٭٭٭٭٭

دور تیری محفل سے رات دن سلگتا ہوں

تو مری تمنا ہے میں ترا تماشا ہوں

٭٭٭٭٭٭٭٭٭

دل کے سنسان جزیروں کی خبر لائے گا

درد پہلو سے جدا ہو کے کہاں جائے گا

٭٭٭٭٭٭٭٭٭

درد کی بات کسی ہنستی ہوئی محفل میں

جیسے کہہ دے کسی تربت پہ لطیفہ کوئی

٭٭٭٭٭٭٭٭٭

وقت کی قبر میں الفت کا بھرم رکھنے کو

اپنی ہی لاش اتاری ہے تمہیں کیا معلوم

٭٭٭٭٭٭٭٭٭

اب اس کے تصور سے بھی جھکنے لگیں آنکھیں

نذرانہ دیا ہے جسے میں نے دل و جاں کا

٭٭٭٭٭٭٭٭٭

وہ داستاں جو تری دل کشی نے چھیڑی تھی

ہزار بار مری سادگی نے دہرائی

٭٭٭٭٭٭٭٭٭

دل سے دل نظروں سے نظروں کے الجھنے کا سماں

جیسے صحراؤں میں نیند آئی ہو دیوانوں کو

٭٭٭٭٭٭٭٭٭

اب نہ کعبہ کی تمنا نہ کسی بت کی ہوس

اب تو زندہ ہوں کسی مرکز انساں کے لیے

٭٭٭٭٭٭٭٭٭

قد و گیسو لب و رخسار کے افسانے چلے

آج محفل میں ترے نام پہ پیمانے چلے

٭٭٭٭٭٭٭٭

▪️پیشکش: نوائے اوچ میڈیا گروپ (رجسٹرڈ)

٭٭٭٭٭٭٭٭٭

▪️علمی و ادبی اقدار اور تاریخی روایات سے ہم آہنگ بامقصد نگارشات اور مقامی و قومی حالات و واقعات پر مبنی مستند خبروں کی ترسیل کے لیے واٹس ایپ پر ‘نوائے اوچ’ کے آفیشل چینل کو فالو کیجیے: