امیر خسرو کی ایک غزل

از من آں کامیاب را چہ غمست

شعرِ خسرو

از من آں کامیاب را چہ غمست

زیں شبِ ماہتاب را چہ غمست

ترجمہ

اس کامیاب (محبوب) کو مجھ سے کیا غم ہے، ماہتاب کو رات کا غم کب ہوتا ہے۔

مجذوب

میرا اس کامیاب کو غم کیا

رات کا ماہتاب کو غم کیا

شعرِ خسرو

ذرّہ ہا گر شوند زیر و زبر

چشمۂ آفتاب را چہ غمست

ترجمہ

اگر تمام ذرے زیر و زبر بھی ہو جائیں تو سورج کے چشمے کو انکے زیر و زبر ہونے کا کیا غم ہے۔

مجذوب

ذرّے زیر و زبر جو ہوں تو ہوں

چشمۂ آفتاب کو غم کیا

شعرِ خسرو

گر بسوزد ہزار پروانہ

مشعلِ خانہ تاب را چہ غمست

ترجمہ

اگر ہزار پروانے بھی جل مریں تو گھر کو روشن کرنے والی مشعل کو اسکا کیا غم ہے۔

مجذوب

جل مریں گو ہزار پروانے

مشعلِ خانہ تاب کو غم کیا

شعرِ خسرو

خرمنِ من کہ گشت خاکستر

آتشِ پُر عذاب را چہ غمست

ترجمہ

میری جان کی کھیتی جل کر راکھ ہوگئی مگر عذاب سے پُر آگ کو اس کا کیا غم ہے۔

مجذوب

خرمنِ جاں جو جل کے راکھ ہوا

آتشِ پر عذاب کو غم کیا

شعرِ خسرو

گر مرا نیست خوابے اندر چشم

چشمِ آں نیم خواب را چہ غمست

ترجمہ

اگر میری آنکھوں میں نیند نہیں رہی تو اسکا اس نیم خواب آنکھوں (والے) کو کیا غم ہے۔

مجذوب

رتجگے ہیں اگر نصیب مرا

دیدۂ نیم خواب کو غم کیا

شعرِ خسرو

خسرو ار جاں دہد تو دیر بہ ذی

ماہی ار میرد آب را چہ غمست

ترجمہ

خسرو تو جان دیتا ہے لیکن تو دیر تک زندہ رہ کہ مچھلی کے مرنے کا پانی کو کیا غم۔

مجذوب

جان خسرو نے دی، تُو جُگ جُگ جی

مرگِ ماہی پہ آب کو غم کیا