اگر گاڑی کا ٹائر تیز رفتاری میں پھٹ جائے یا پنکچر ہو جائے تو کیا کِیا جائے…؟؟

ہالینڈ(ڈیلی روشنی نیوز انٹرنیشنل )کچھ عرصہ قبل ہمارے سابقہ چیئرمین جوائنٹ چیفس آف سٹاف کمیٹی جنرل خالد شمیم وائیں ایک حادثے میں جان کی بازی ہار گئے تھے۔وجہ تیز رفتاری میں ٹائر پھٹنا بنی، گاڑی بم پروف تھی مگر پھر بھی قیمتی جانوں کا ضیاع ہوا۔مجھے یہ بات واضح کرنی ہے کہ ایسی صورت میں اگر ڈرائیور اپنے اوسان بحال رکھے تو بہت بڑے حادثے سے بچا جا سکتا ہے۔

اس کیلئے چھ سادہ سے اقدامات ہیں جس سے دو منٹ کے اندر اندر گاڑی کو محفوظ حالت میں روکا جا سکتا ہے۔

1_ٹائر پھٹنے پر گھبرائیے نہیں اور خود کو فوری طور پر چوکس کریں اور اعصاب کو نارمل رکھیں اور اعتماد کے ساتھ اس سیچویشن کو سنبھالیں کیونکہ اس وقت آپکی گاڑی بے قابو ہو رہی ہوگی تو آپکا قابو میں رہنا لازمی ہے۔ سب کچھ آپ کے کنٹرول میں ہے اور اب آپ نے گاڑی کو بھی قابو کرنا ہے۔

2_سٹیرنگ وہیل کو مضبوطی سے دونوں ہاتھوں سے پکڑ لیں۔کسی بھی قسم کے کٹ مارنے یا موڑنے کی کوشش ہرگز نہ کریں(اگر ممکن ہو تو ہیزرڈ لائیٹ کا بٹن دبا دیں۔مگر ضروری نہیں ہے)۔اپنے شیشوں کی مدد سے پیچھے کی ٹریفک پر توجہ مرکوز کریں اور سڑک پر دھیان رکھیں۔گاڑی کی حرکت کو محسوس کریں کہ وہ کس جانب پُل کر رہی ہے یا کھینچ رہی ہے۔جس طرف کا ٹائر پھٹا ہے گاڑی اسی طرف کو مڑے گی یا کھنچے گی لہذا آپکی سٹیرنگ پر گرفت مضبوط ترین ہونی چاہیئے۔

3_گاڑی مینول ہے تو کوشش کرکے اسے دوسرے گئیر میں کر لیں اور آٹو ہے تو دھیرے دھیرے ایکسلریٹر(ریس) سے پاؤں ہٹائیں اور کبھی بھی بریک نہ لگائیں۔بریک بالکل نہیں لگانی کیونکہ 95 فیصد امکان ہے کہ جونہی آپ بریک لگائیں گے گاڑی الٹ جائے گی۔گاڑی کی سپیڈ خود کم ہوتی جائے گی اور آپ کو اس وقت یہ خیال رکھنا ہوگا کہ سڑک پر موجود دیگر گاڑیوں سے خود کو کیسے بچانا ہے۔(رِم کے نقصان پر توجہ نہ دیں کیونکہ آپ کی جان قیمتی ہے رِم نہیں)۔

4_گیئر کو نیوٹرل میں ڈال دیں اور اپنے سٹیرنگ کو قابو میں رکھیں مضبوطی کے ساتھ اور نظر اور توجہ سڑک پر رکھیں۔

5_اس وقت تک آپکی سپیڈ اصل سپیڈ کی نسبت کافی کم ہو کر لگ بھگ 50 کلومیٹر تک آ پہنچے گی۔یہ وقت ہے جب آپ آہستہ آہستہ بریک لگا سکتے ہیں مگر یک دم نہیں، مقصد ہے سپیڈ کو کم کرنا نہ کہ روکنا۔اب آپ گاڑی کو سڑک کے کنارے کی طرف لے جانے کی پوزیشن میں ہیں اور اشارہ بھی دے دیں تاکہ پیچھے سے آنے والی گاڑیوں کو آپ کی حرکت کا اندازہ ہو سکے۔گاڑی کو اپنے بائیں جانب لے جا کر روکنے کیلئے تیار ہو جائیں۔

6_اب آپ بالآخر محفوظ ہیں اور گاڑی کو روک سکتے ہیں۔گاڑی کو روکیں اور انجن بند کر دیں۔ہیزرڈ لائٹ جلا دیں اور اُتر کر گاڑی کے پھٹے ہوئے ٹائر کا جائزہ لیں۔کئی بار رگڑ لگنے سے ٹائر کو آگ بھی لگ سکتی ہے۔اگر ایسا ہے تو سب مسافروں کو گاڑی سے اتار دیں اور اگر آپ کے پاس آگ بجھانے کا آلہ ہے تو فوری طور پر اس کی مدد سے آگ بجھائیں ورنہ پانی یا مٹی سے بھی یہ کام کِیا جا سکتا ہے۔اگر کسی وجہ سے آگ بجھانا ممکن نہ ہو تو گاڑی سے دور ہٹ جائیں اور کسی بھی دوسری گاڑی سے مدد طلب کریں کہ شاید آگ بجھانے کا آلہ مل جائے۔گھبرانا یا خوف زدہ نہیں ہونا کیونکہ اب آپ نے اپنی اور اپنے ساتھیوں کی جان بچا لی ہے۔اگر آگ نہیں لگی تو گاڑی اور ٹائر کو ٹھنڈا ہونے دیں اور پھر ٹائر بدلیں۔

آخری بات یاد رکھیں کہ ڈرائیور کا تجربہ کار ہونا اور مضبوط اعصاب کا ہونا لازمی ہے۔اناڑی ڈرائیور ہمیشہ خوف زدہ ہو کر بریک لگاتے ہیں اور گاڑی الٹ جاتی ہے جس سے جانی نقصان کا اندیشہ ہے۔یہ بات یاد رکھیں کہ ایسے موقع پر گاڑی میں موجود سب لوگ ڈرے ہوئے ہونگے۔کسی کی مت سنیں اور صرف سڑک پر اور گاڑی پر توجہ مرکوز رکھیں کیونکہ ڈرائیور آپ ہیں وہ نہیں۔

اب آپ کے ذمے ہے کہ ان معلومات کو زیادہ سے زیادہ شیئر کریں اور جتنا ہو ممکن سکے لوگوں تک پہنچانے کی کوشش کریں۔ہو سکتا ہے آپکی وجہ سے کئی قیمتی جانیں بچ جائیں۔

اللہ پاک ہمیں اپنی حفظ و امان میں رکھیں اور کسی بھی قسم کے حادثے سے محفوظ رکھیں…(آمین)

نوٹ: گاڑی کے ٹائروں پر کبھی سمجھوتہ نہیں کرنا چاہیئے تھوڑے سے بھی کمزور ہو جائیں تو فوری طور پر بدل دیں۔ آپ کی جان قیمتی ہے۔ٹائر تو گِھستے ہیں، سو بدلنے تو پڑتے ہیں بہتر ہے کہ نقصان سے پہلے بدل لیں۔

#منقول

(ایسی پوسٹ شئیر کر دِیا کریں تاکہ زیادہ سے زیادہ لوگ مستفید ہو سکیں)