ایک غیر معمولی عورت کا غیر رسمی تعارف
میں اسے ضرورت سے کچھ زیادہ جانتا ہوں
اس تعلق میں یہی ایک المیہ ہے
کئی بار اپنے بارے میں جاننے کے لیے مجھے اس سے مدد لینی پڑی
اس کے سوالوں کا جواب دینے کے لیے
میرے پاس سچ بولنے کے سوا کوئی چارہ نہیں ہوتا
میں کبھی اس کے ساتھ سو نہیں سکا
کیوں کہ وہ ان عورتوں میں سے نہیں جو خواب دیکھتی ہیں
پہلی بار میں نے اسے بتایا کہ وہ دنیا کی حسین ترین عورت ہے
مگر وہ یہ بات پہلے سے جانتی تھی
اسے حیران کرنا آسان نہیں
اس کے لیے کوئی کام نیا کام نہیں
اسے محبت کرنے کا سلیقہ ہے
میں نے اس کے ہاتھوں کو چھو کر اندازہ لگایا
کہ کچھ عورتیں کسانوں سے زیادہ جفاکش ہوتی ہیں
وہ لا محددود سوچ کی حامل ہے
اسکی محبت کا دائرہ بحر الکاہل کی طرح براعظموں کے بیچ پھیلا ہوا ہے
اور اسکا سینہ زمین کی طرح کشادہ ہے
جس میں زندگی پھل پھول سکتی ہے
وہ دنیا کو ایک ولی اللہ کی نسبت زیادہ عارضی سمجھتی ہے
اور کبھی کہیں اپنا گھر نہیں بنایا
حالانکہ وہ چاہے تو میرے دل میں رہ سکتی ہے
مگر اسے اپنے پرستاروں سے خوف آتا ہے
وہ کئی لاوارث بچوں کی ماں ہے
مگر مجھے گود لینے نہ لینے کی کشمکش میں ہے
اور ابھی تک اس بارے میں حتمی فیصلہ نہیں کر سکی
کیونکہ وہ عام عورتوں کی طرح جلد باز اور جذباتی نہیں
میں ایک بار اپنی محبوبہ کی بے وفائی پر اس کی گود میں سر رکھ کے رو چکا ہوں
اس کے پاس بہت اچھی اچھی تسلیاں ہیں
جو بڑے سے بڑے دکھ کو آسانی سے بھلا دینے میں مدد گار ثابت ہوتی ہیں
اس کا بچپن ادھورا ہے
بعض اوقات وہ اسے مکمل کرنے کے لیے چھوٹے بچوں کے ساتھ کھیلنے لگ جاتی ہے
اور ان بچوں کی طرح بولنے لگتی ہے جو ابھی بولنا سیکھ رہے ہوں
وہ دنیا کی ان چند عورتوں میں سے ایک ہے
جو مرد کو بے وفا نہیں سمجھتی۔
