زمین سے رہ گیا ہے دُور ــــــــ آسمان کتنا
سِتارہ اپنے سفر میں ہے خُوش گُمان کتنا

پرند پیکاں بدوش پرواز کر رہا ہے
رہا ہے اِس کو خیالِ صیّادگان کتنا

ہَوا کا رُخ دیکھ کر سمندر سے پُوچھنا ہے
اُٹھائیں اب کشتیوں پہ ہم،،، بادبان کتنا

بہار میں خُوشبُوؤں کا نام و نسب تھا جس سے
وُہی شجر آج ہو گیا ــــــ بے نشان کتنا

گِرے اگر آئینہ ‘ تو اِک خاص زاویے سے
وَگرنہ ہر عکس کو رہے خُود پہ مان کتنا

بنا کسی آس کے ،،، اُسی طرح جی رہا ہے
بچھڑنے والوں میں تھا کوئی سخت جان کتنا

وُہ لوگ کیا چل سکیں گے جو اُنگلیوں پہ سوچیں
سفر میں ہے دُھوپ کِس قدر ،،، سائبان کتنا

(خوشبوؤں کی شاعرہ)
پروینؔ شاکر ¹⁹⁹⁴-¹⁹⁵²
مجموعۂ کلام : (صدِ برگ)