شارجہ میں کھیلے گئے تین ملکی سیریز کے آخری لیگ میچ میں افغانستان نے دلچسپ مقابلے کے بعد متحدہ عرب امارات کو 4 رنز سے شکست دے دی۔

شارجہ میں کھیلے گئے آخری لیگ میچ میں افغانستان نے ٹاس جیت کر بیٹنگ کا فیصلہ کیا۔افغانستان نے مقررہ 20 اوورز میں 4 وکٹوں کے نقصان پر 170 رنز بنائے۔

ابراہیم زادران 48 اور رحمان اللہ گرباز 40 رنز بناکر نمایاں رہے۔ یواے ای کی جانب سے حیدر علی نے دو کھلاڑیوں کو آؤٹ کیا۔

افغانستان کے 170 رنز کے جواب میں یو اے ای کی ٹیم 5 وکٹ پر 166 رنز بناسکی۔ امارات کے محمد وسیم 44 اور آصف خان 40 بناکر نمایاں رہے، علی شان شرفو نے 27 رنز اسکور کیے۔

ایونٹ میں یو اے ای کی ٹیم اپنے چاروں میچز میں شکست کھاگئی۔ پاکستان اور افغانستان کے درمیان فائنل اتوار کو ہوگا۔