بُھلا پاؤں کہاں ایسا دسمبر
درِ اقدس پہ جو گذرا دسمبر
وہ صحنِ مسجدِ نبوی کا گوشہ
نچھاور اس پہ وہ ہوتا دسمبر
تھی ہر جانب مرے بارانِ رحمت
عجب ہی رنگ سے برسا دسمبر
ہؤا سیراب تشنہ دل، جہاں تھا
حرم کا صحن اور بھیگا دسمبر
بنا مانگے مرا کاسہ بھرا تھا
سخی اس سال تھا کتنا دسمبر
معطر تھا مدینے کی ہوا سے
عبیر و عود سے مہکا دسمبر
حرم کے سائے میں گذرے جو میرا
اے مالک پھر کبھی وہ لا دسمبر
رابعہ بتول
