خصوصی کلام
شاعر ۔۔۔۔۔۔۔ نا معلوم
ذرا دیکھ کے چال ستاروں کی..
کوئی ذائچہ کھینچ قلندر سا
کوئی ایسا جنتر منتر پڑھ
جو کر دے بخت سکندر سا..!!
کوئی ایسا چلّا کاٹ کہ پھر
کوئی کاٹ نہ اس کی کر پائے
کوئی ایسا دے تعویذ مجھے
وه عاشق مجھ پہ ہو جائے..!
کوئی فال نکال ،کرشمہ کر
میری راه میں پھول گلاب آئیں
کوئی پانی پھونک کے دے ایسا
وه پیئے تو میرے خواب آئیں..!
کوئی ایسا انتر جادو کر
جو جگمگ کر دے میرے دن
وه کہے مجھ سے جلدی آ
اب جیا نہ جائے تیرے بن..!
کوئی ایسی راه پہ ڈال مجهے
جس راه سے وه دلدار ملے
کوئی تسبیح دم درود بتا
جسے پڑهوں تو میرا یار ملے..’!!
کوئی قابو کر بے قابو جن
کوئی سانپ نکال پٹاری سے
کوئی دهاگا کھینچ پراندے کا
کوئی منکا اکشا دهاری سے…!!
کوئی ایسا بول سکھا دے نا
وه سمجھےخوش گفتار ہوں میں
کوئی ایسا عمل کرا دے نا
وه جانے، جانثار ہوں میں..!!
کوئی ڈهونڈھ کے وه کستوری لا
اسے لگے میں چاند کےجیسی ہوں
جو مرضی میرے یار کی ہے
اسے لگے میں بالکل ویسی ہوں..!!
کوئی ایسا اسمِ اعظم پڑھ
جو اشک بہا دے سجدوں میں
اور جیسے تیرا دعوی ہے
محبوب ہو میرے قدموں میں..!!
پر عامل رک،اک بات کہوں..؟
یہ قدموں والی بات ہے کیا..؟
محبوب تو ہے سر آنکھوں پر
مجھ پتھر کی اوقات ہے کیا..؟
اور عامل سن، یہ کام بدل
یہ کام بہت نقصان کا ہے
سب دهاگےاس کے ہاتھ میں ہیں
جو مالک کل جہان کا ہے…!
نامعلوم
