آل راؤنڈر محمد نواز 2025 میں پاکستان ٹی 20 ٹیم کے بہترین پرفارمنس پیش کرنے والے کھلاڑی بن گئے۔

راولپنڈی سے تعلق رکھنے والے 31 سالہ بائیں ہاتھ کے اسپنر اور بائیں ہاتھ کے بلے باز محمد نواز  پر وائٹ بال ہیڈ کوچ مائیک ہیسن نے جو اعتبار اور اعتماد کیا، اس پر وہ مکمل طور  پر پورا اترے، بالخصوص مختصر فارمیٹ ٹی 20 میں آل راؤنڈر محمد نواز سب سے آگے رہے۔

محمد نواز جولائی 2025 میں فلوریڈا میں ویسٹ انڈیز کے خلاف 21.52 کی اوسط سے 7 وکٹ لے کر مین آف دی سیریز رہے جبکہ اگست 2025 میں شارجہ میں پاکستان، افغانستان اور یو اے ای سیریز کے 5 میچوں میں 120رنز اور 10وکٹ کے ساتھ بہترین کھلاڑی رہے۔

تیسری بار وہ نومبر 2025 میں راولپنڈی میں پاکستان، سری لنکا اور زمبابوے ٹرائی سیریز میں 52 رنز اور 10وکٹ لے کر سیریز کے بہترین کھلاڑی بنے، 2025 میں محمد نواز 26 ٹی 20 میچز میں 4 مرتبہ بہترین کھلاڑی قرار پائے۔

اس دوران آل راؤنڈر نے پاکستان کے لیے 74.4 اوورز کروائے اور 490 رنز دیے جس میں انہوں نے 13.16 کی اوسط سے 2025 ٹی 20 کلینڈر ایئر میں سب سے زیادہ 36 وکٹیں حاصل کیں۔

بائیں ہاتھ کے بیٹر نے 19.05 کی اوسط سے 362 رنز بنائے، بہترین اسکور ناٹ آؤٹ 38 رنز رہا جبکہ 138.16 کے اسٹرائیک ریٹ سے کھیلتے ہوئے انہوں نے 24 چوکے اور 21 چھکے لگائے۔