اسلام آباد: وزیر مملکت برائے پیٹرولیم مصدق ملک نے کہا ہےکہ پیٹرولیم مصنوعات کےدو جہاز یو اے ای سےگورنمنٹ ٹو گورنمنٹ بنیاد پرخریدیں گے جب کہ پیٹرولیم مصنوعات کا ایک جہازآذربائیجان سےخریدیں گے۔
وزیر مملکت نے کہا کہ آئی ایم ایف سے ہمیں 9 ماہ کے لیے ریلیف ملا ہے لیکن آئی ایم ایف معاہدے کے بعد معیشت بحالی کے لیے مزید اقدامات کرنا ہوں گے جب کہ آنے والی حکومت کو آئی ایم ایف معاہدے سے کوئی مسئلہ نہیں ہوگا۔
انہوں نے کہا کہ اگست میں حکومت مدت پوری کرے گی اس کے بعدالیکشن مقررہ وقت پر ہوں گے، سیاسی اتحاد کا فیصلہ الیکشن کا وقت آنے پرہوگا، نگراں حکومت میں کون کون شامل ہوگا ابھی تک ناموں پرفیصلہ نہیں ہوا، نگراں حکومت زیادہ سے زیادہ 90 دن اورکم سے کم 60 دن میں الیکشن کرائے گی۔
وزیر مملکت کا کہنا تھا کہ بجلی ترسیل کے نظام میں اصلاحات کرنے کی ضرورت ہے، بجلی چوری روکنے کے لیے اسمارٹ میٹرز لگائے جارہے ہیں، پنجاب، سندھ، خیبرپختونخوا میں کچھ فیڈرز پر80 فیصد تک بجلی چوری ہوتی ہے۔
انہوں نے مزید کہا کہ پیٹرول پر لیوی مزید 5 سے 7 روپے تک بڑھ سکتی ہے لیکن آنے والے دنوں میں تیل کی قیمتوں میں ریلیف دینے کی کوشش کریں گے۔
مصدق ملک کا کہنا تھا کہ ہم نے دو نئے معاہدے کیے ہیں، ایک معاہدہ متحدہ عرب امارات سےکیا ہے لیکن امارات سے کیے گئے معاہدے پر ابھی دستخط نہیں ہوئے۔
انہوں نے بتایا کہ پیٹرولیم مصنوعات کےدو جہاز یو اے ای سےگورنمنٹ ٹو گورنمنٹ بنیاد پرخریدیں گے جب کہ پیٹرولیم مصنوعات کا ایک جہازآذربائیجان سےخریدیں گے۔
