۔۔۔۔ غزل ۔۔۔۔

شاعر  ۔۔۔۔۔۔۔ منیر نیازی

یہ کیسا نشہ ہے ، مَیں کس عجب خُمار میں ہُوں

تو آ کے جا بھی چکا ہے،،، مَیں انتظار میں ہُوں

مکاں   ہے  قبر ــــــــ جِسے  لوگ خود بناتے ہیں

مَیں اپنے گھر میں ہُوں یا مَیں کسی مزار میں ہُوں

درِ  فصیل  کُھلا   ، یا   ،،،  پہاڑ   سر   سے   ہٹا

مَیں اب گِری ہُوئی گلیوں کے مرگِ زار میں ہُوں

بس اِتنا ہوش ہے مُجھ کو کہ اجنبی ہیں سب

رُکا  ہُوا  ہُوں  سفر  میں ،  کسی  دیار میں ہُوں

مَیں ہُوں بھی اور نہیں بھی عجیب بات ہے یہ

یہ کیسا جبر ہے مَیں جس کے اختیار میں ہُوں

مُنیرؔ ـــــــــ دیکھ شجر ، چاند ، اور دِیواریں

ہَوا خزاں  کی  ہے  سر  پر ،  شبِ بہار میں ہُوں

شاعر : مُنیرؔ نیازی ²⁰⁰⁶-¹⁹²⁷

مجموعۂ کلام : (ماہِ مُنیر)