🌙 حضرت عمرؓ کی راتوں کی گواہی دینے والا ایک سبق آموز واقعہ

ہالینڈ(ڈیلی روشنی نیوز انٹرنیشنل )حضرت اسلمؒ فرماتے ہیں کہ ایک رات میں  (حضرت عمر بن خطاب رضی اللہ عنہ) کے ساتھ حرّہ واقم کی طرف نکلا۔ جب ہم مقامِ صرار کے قریب پہنچے تو دور ایک آگ جلتی نظر آئی۔ آپؓ نے فرمایا:

“اے اسلم! لگتا ہے کچھ مسافر سردی اور رات کی سختی کی وجہ سے پریشان حال ہیں، آؤ ان کے پاس چلتے ہیں۔”

ہم تیزی سے ان کی طرف بڑھے۔ قریب پہنچے تو دیکھا کہ ایک عورت اپنے چھوٹے بچوں کے ساتھ بیٹھی ہے۔ ہانڈی آگ پر چڑھی ہوئی تھی اور بچے بھوک سے رو رہے تھے۔ آپؓ نے فرمایا:

“اے روشنی والو! السلام علیکم!”

(آپؓ نے ادباً “اے آگ والو” کہنا پسند نہ فرمایا)

عورت نے جواب دیا: “وعلیکم السلام”

آپؓ نے فرمایا: “کیا ہم قریب آ سکتے ہیں؟”

عورت بولی: “خیر سے قریب آ جائیں یا ہمیں چھوڑ دیں۔”

جب ہم قریب ہوئے تو آپؓ نے پوچھا:

“تمہیں کیا تکلیف ہے؟”

اس نے کہا: “رات کی سردی ہے اور بچے بھوک سے رو رہے ہیں۔”

آپؓ نے پوچھا: “ہانڈی میں کیا پک رہا ہے؟”

عورت بولی: “اس میں کچھ نہیں، صرف پانی ہے۔ بچوں کو بہلا رہی ہوں تاکہ سو جائیں۔ ہمارے اور عمر کے درمیان اللہ ہے!”

یہ سن کر آپؓ نے فرمایا:

“اللہ تم پر رحم کرے! عمر کو تمہارے حال کی کیا خبر؟”

عورت نے کہا: “وہ ہمارا حاکم ہے مگر ہم سے بے خبر ہے!”

یہ سن کر حضرت عمرؓ فوراً بیت المال کی طرف روانہ ہوئے، آٹے کی بوری اور چربی کا ڈبہ خود اپنے کندھے پر اٹھایا۔ میں نے عرض کیا:

“یہ بوجھ میں اٹھا لیتا ہوں”

آپؓ نے فرمایا:

“کیا قیامت کے دن بھی میرا بوجھ تم اٹھاؤ گے؟”

پھر ہم تیزی سے واپس آئے۔ آپؓ نے خود کھانا تیار کیا، ہانڈی کے نیچے جھک کر پھونکیں ماریں، یہاں تک کہ دھواں آپؓ کی داڑھی مبارک میں داخل ہو رہا تھا۔ پھر اپنے ہاتھوں سے بچوں کو کھانا کھلایا، یہاں تک کہ وہ سیر ہو گئے اور ہنسنے لگے۔

وہ عورت کہنے لگی:

“اللہ آپ کو جزائے خیر دے! آپ امیرالمؤمنین ہونے کے زیادہ حق دار ہیں!”

آپؓ نے فرمایا:

“جب امیرالمؤمنین کے پاس جاؤ تو میرے بارے میں اچھی بات کہنا، ان شاء اللہ وہاں میری بھی ملاقات ہوگی۔”

پھر آپؓ کچھ فاصلے پر بیٹھ گئے اور بچوں کو کھیلتے دیکھتے رہے، یہاں تک کہ وہ سکون سے سو گئے۔ اس کے بعد فرمایا:

“اے اسلم! بھوک نے ان کی نیند چھین لی تھی، اس لیے میں واپس نہیں جانا چاہتا تھا جب تک انہیں سکون سے سوتا نہ دیکھ لوں۔”

✨ یہی تھا وہ حکمران جو راتوں کو جاگ کر رعایا کی خبرگیری کرتا تھا۔ یہی تھا انصاف، یہی تھی ذمہ داری، یہی تھا حقیقی اسلامی نظامِ حکومت کا نمونہ۔

📚 حوالہ: فضائل الصحابہ — امام احمد بن حنبلؒ

دوستو! اگر کبھی کوئی اچھی بات، نصیحت یا سبق آموز واقعہ پڑھنے کو ملے تو اسے دوسروں تک ضرور پہنچائیں۔ ممکن ہے آپ کا ایک لمحہ کسی کی زندگی بدل دے۔ 🤍

اگر آپ کو یہ تحریر اچھی لگے تو مجھے فالو ضرور کریں۔ جزاکم اللہ خیراً کثیراً۔ 🌹

#HazratUmarRA #Compassion #Justice #HelpingTheNeedy #IslamicHistory #Kindness #ServiceToHumanity #AmirAlMominin