پاکستان وائٹ بال کرکٹ ٹیم کے ہیڈکوچ مائیک ہیسن نےکہا ہےکہ ہم نے حالیہ  ٹی ٹوئنٹی سیریز  اور  ایشیا کپ کے لیے ایک انتہائی شاندار  اسکواڈ تشکیل دیا ہے۔

مائیک ہیسن نے سوشل میڈیا پر پاکستان کے ایشیا کپ اور ٹی ٹوئنٹی اسکواڈ پر تبصرہ کرتے ہوئے کہا کہ یہ دیکھ کر اچھا لگا کہ کچھ نئے کھلاڑی سینئر اور تجربہ کار کھلاڑیوں کے ساتھ اپنی جگہ بنا رہے ہیں، سہہ ملکی سیریز اور ایشیا کپ کے لیے تجربہ کار اور نئے کھلاڑیوں کا یہ اچھا امتزاج ہے۔

مائیک ہیسن کا کہنا تھا کہ ہمارے اسکواڈ میں یو اے ای کنڈیشنز کے حساب سے 5 پیسرز اور دو مسٹری اسپنرز شامل ہیں، مجموعی طور پر اچھی بیٹنگ، نمایاں بہتری والی فیلڈنگ اور بولنگ اٹیک کے ساتھ یہ ایک بہترین اور متوازن اسکواڈ ہے۔

مائیک ہیسن نے اپنے پیغام کے آخر میں ” پاکستان زندہ باد” بھی لکھا۔

خیال رہےکہ متحدہ عرب امارات میں ہونے والی تین ملکی ٹی ٹوئنٹی سیریز اور ایشیا کپ کے لیے پاکستانی اسکواڈ کا اعلان کردیا گیا ہے۔

پاکستان، افغانستان اور یو اے ای کی ٹرائی نیشن سیریز 29 اگست سے 7 ستمبر تک شارجہ میں ہو گی جب کہ ایشیا کپ 9 سے 28 ستمبر تک ابو ظبی اور دبئی میں منعقد ہوگا۔

17 رکنی اسکواڈ کا اعلان سلیکٹر اور ڈائریکٹر ہائی پرفارمنس عاقب جاوید اور ہیڈ کوچ مائیک ہیسن نے پریس کانفرنس میں کیا۔

سلمان علی آغا کو 17 رکنی اسکواڈ کا کپتان برقرار رکھا گیا ہے، اس کے علاوہ اسکواڈ میں فخر زمان، شاہین شاہ آفریدی، حارث رؤف، صائم ایوب، خُوشدل شاہ، حسین طلعت شامل ہیں۔

محمد نواز، محمد وسیم جونیئر، محمد حارث ، ابرار احمد، فہیم اشرف، حسن علی، حسن نواز،صاحبزادہ فرحان، سلمان مرزا اور سفیان مقیم بھی اسکواڈ کا حصہ ہیں۔

اسکواڈ میں بابر اعظم، محمد رضوان اور نسیم شاہ شامل نہیں ہیں۔

 عاقب جاوید کا کہنا تھا کہ ٹی ٹوئنٹی اگر سیدھے بلے سے کھیلنا ہے تو پھر ٹی ٹوئنٹی کھیلنی نہیں چاہیے، صائم، صاحبزادہ اور فخر زمان اچھا کھیل رہے ہیں ان پر کسی کو شک نہیں ہونا چاہیے۔

عاقب جاوید کا کہنا تھا کہ کسی کھلاڑی کی فارم کو تین میچز کی فارم پر جانچنا ایک سخت فیصلہ ہے، بابر نے پہلا میچ اچھا کھیلا، انہیں کچھ ایریاز میں بہتر کرنےکا کہا گیا ہے، صاحبزادہ فرحان 6 میچز میں سے تین میں مین آف دی میچ رہے ہیں۔

عاقب جاوید کے مطابق بابر اعظم اور محمد رضوان اس سے پہلے تین سیریز میں نہیں تھے، بابر اور رضوان دیگر کی طرح کھیلیں گے تو ضرور ٹی ٹوئنٹی کھیلیں گے، ان کے ساتھ کسی کو پرابلم نہیں ہے لیکن اس وقت ہمارے پاس آپشنز اچھے ہیں۔ صائم ، فخر اور صاحبزادہ فرحان ہی ٹاپ آرڈر میں تھے۔ کسی کھلاڑی کو دو تین میچز کی بنیاد پر زیر غور نہ لانے والی بات درست نہیں، ہم یہ نہیں کہہ سکتے کہ اب ہم بابر اور رضوان کو زیر غور کبھی نہیں لائیں گے۔