غزل

شاعر۔۔۔علامہ محمد اقبال

عقل ہےبےزمام ابھي ،عشق ہے بے مقام ابھي

نقش گر ، ازل! ترا نقش ہے نا تمام ابھي

خلق خدا کي گھات ميں رندوفقيہ و ميرو پير

تيرےجہاں ميں ہےوہي گردش صبح وشام ابھي

تيرے امير مال مست ، تيرے فقير حال مست

بندہ ہے کوچہ گرد ابھي ، خواجہ بلند بام ابھي

دانش و دين و علم و فن بندگي ہوس تمام

عشق گرہ کشاے کا فيض نہيں ہے عام ابھي

جوہر زندگي ہے عشق ، جوہر عشق ہے خودي

آہ کہ ہے يہ تيغ تيز پردگي نيام ابھي!

۔۔۔۔۔

فرمان خدا

(فرشتوں سے)

اٹھو ! مري دنيا کے غريبوں کو جگا دو

کاخ امرا کے در و ديوار ہلا دو

گرماؤ غلاموں کا لہو سوز يقيں سے

کنجشک فرومايہ کو شاہيں سے لڑا دو

سلطاني جمہور کا آتا ہے زمانہ

جو نقش کہن تم کو نظر آئے ، مٹا دو

جس کھيت سے دہقاں کو ميسر نہيں روزي

اس کھيت کے ہر خوشہ گندم کو جلا دو

کيوں خالق و مخلوق ميں حائل رہيں پردے

پيران کليسا کو کليسا سے اٹھا دو

حق را بسجودے ، صنماں را بطوافے

بہتر ہے چراغ حرم و دير بجھا دو

ميں ناخوش و بيزار ہوں مرمر کي سلوں سے

ميرے ليے مٹي کا حرم اور بنا دو

تہذيب نوي کارگہ شيشہ گراں ہے

آداب جنوں شاعر مشرق کو سکھا دو!

علامہ محمد اقبال