آئی اے پی جے کا تنظیمی حوالے سے اہم اجلاس*

تنظیم کو منظم اور فعال بنانے پر ذمہ داران کے کردار کو سراہتے ہیں۔ شاھد چوھان

ہالینڈ  (  ڈیلی روشنی نیوز انٹرنیشنل  ۔۔۔۔۔۔ رپورٹ  ۔۔۔۔۔ نمائندہ خصوصی  )انٹرنیشنل ایسوسی ایشن آف پاکستانی جرنلسٹس کا تنظیمی امور کے حوالے سے ایک اہم  آن لائن اجلاس منعقد کیا گیا جس میں آئی اے پی جے کے صدر شاہد چوہان ، نائب صدور کیپٹن فرید احمد انصاری، خالد نواز چیمہ، وائس چئیرمین صغیر رامے، چیف آرگنائزر وسیم بٹ، چیئرپرسن ادبی کمیٹی حمیرا گل تشنہ، سیکرٹری جنرل مہوش خان، سیکرٹری انفارمیشن رضوان خان، سینئر جوائنٹ سیکرٹری مطیع اللہ، فنانس سیکرٹری عرفان احمد فراز، جوائنٹ سیکرٹری جاوید عظیمی اور ایگزیکٹو باڈی کے ممبران نے بذریعہ زوم شرکت کی۔

اجلاس کا باقاعدہ آغاز تلاوت قرآن پاک سے کیا گیا جس کی سعادت جاوید عظیمی نے حاصل کی سیکرٹری جنرل مہوش ظفر نے شرکاء کو خوش آمدید کہا جبکہ صدر شاہد چوہان نے تنظیم کے حوالے سے ذمہ داران کے کردار کو سراہا اور آئی اے پی جے کی تنظیم نو کے ساتھ ساتھ تنظیم کی ترویج و ترقی کے لیے کام کرنے کے لیے مختلف موضوعات پر روشنی ڈالی، چیف آرگنائزر وسیم بٹ نے تنظیم کے ماہانہ اجلاس کو باقاعدگی کے ساتھ بلانے پر زور دیا۔ وائس چئیرمین صغیر رامے کا کہنا تھا کہ ایک صحافی کو ہر قسم کی سیاسی وابستگی سے بالاتر ہوکر اپنے شعبے سے منسلک ہونا چاہیے۔

مجموعی طور پر اجلاس میں اوورسیز صحافیوں کیلئے مختلف پروگراموں کے انعقاد پر تبادلہ خیال کیا گیا اور طے کیا گیا کہ صحافیوں کی بہتر رہنمائی اور تعلیم و تربیت کے لیے مختلف پروگرام ترتیب دیے جائیں گے جس میں پاکستان اور دنیا بھر سے اہم شخصیات کو دعوت دی جائے گی۔

اجلاس میں ادبی کمیٹی کو فعال بنانے اور ادبی نشستیں منعقد کروانے پر بھی زور دیا گیا جس کی ذمہ داری چئیر پرسن حمیرا گل تشنہ نے قبول کی۔ اجلاس کے آخر میں آئی اے پی جے کے سینئر جوائنٹ سیکرٹری مطیع اللہ کی صحت یابی کے لیے خصوصی دعا کی گئی جو کہ کینسر کے موذی مرض سے جنگ لڑ رہے ہیں۔

ایک کامیاب اجلاس منعقد ہونے پر صدر شاہد چوہان نے سب کا شکریہ ادا کیا اور امید ظاہر کی کہ ایگزیکٹو باڈی کے ارکان آئیندہ بھی اپنی حاضری کو یقینی بنائیں گے اور تنظیم کی تعمیر و ترقی کے لیے اپنا کردار ادا کرتے رہیں گے۔ جاوید عظیمی کی خوبصورت دعا کے ساتھ اجلاس اپنے اختتام کو پہنچا۔