تازہ غزل ۔۔ نذرِ احبابِ گرامی ۔۔۔

تحریر۔۔۔نسرین سید

وہ ، دلوں کے جو خریدار ہوا کرتے تھے

باعثِ گرمئی بازار ہوا کرتے تھے

کوئی خوشبو تھی کہ مہکاتی تھی دل کی گلیاں

اُن کے آنے کے ، یہ آثار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رت جگے راس کچھ ایسے تھےاِن آنکھوں کو، کبھی

خواب آنکھوں پہ گراں بار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 اب مرے غم کو ہنسی میں جو اُڑا دیتے ہیں

ہاں، یہی تو مرے غم خوار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ان کے دیدار پہ کی ہم نے  ثنائے ربی

کون کہتا ہے، گنہ گار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وقت نے ریت کی مانند اُڑا ڈالا انہیں

جو مری راہ کی دیوار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

راستہ ان کو بدلنے میں کہاں دیر لگی

دل شکن ہیں جو ، یہ دلدار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وقت کے ساتھ بدلتے انہیں دیکھا میں نے

جو مرے حاشیہ بردار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آستیں جھاڑ کے دیکھا تو کھلا یہ عقدہ

یہ جو موذی ہیں ، مرے یار ہوا کرتے تھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آئینے ایسے بھی توڑے ہیں انا کے نسرین

وہ  ، جو سرمائہء پندار ہوا کرتے تھے

( نسرین سید )