پشاور: فیلڈ مارشل سید عاصم منیر نے دوٹوک الفاظ میں کہا ہے کہ  پاکستان اپنی سر زمین پرافغان سرزمین سے دہشت گردی برداشت نہیں کرے گا،  پاکستان اپنے تمام ہمسایہ ممالک خصوصاً افغانستان کے ساتھ امن چاہتا ہے۔

پاک فوج کے شعبہ تعلقات عامہ( آئی ایس پی آر) کے مطابق فیلڈ مارشل سید عاصم منیر نے پشاور کا دورہ کیا اور اس دوران  قبائلی عمائدین کے جرگے سے ملاقات بھی کی۔

آئی ایس پی آر کے مطابق دورے کے دوران فیلڈ مارشل سید عاصم منیر کو  پاک افغان سرحد پر امن واستحکام برقرار رکھنے کیلئے جاری انسدادِ دہشتگردی کی کاروائیوں پر بھی تفصیلی بریفنگ دی گئی۔

اس کے علاوہ پشاورکور ہیڈ کوارٹرز میں فیلڈ مارشل کو خطے کی موجودہ سکیورٹی صورتحال اور آپریشنل تیاریوں پر بریفنگ  دی گئی۔

فیلڈ مارشل عاصم منیر نے جرگے سے خطاب کرتے ہوئے قبائلی عوام کی غیرمتزلزل حمایت کو سراہا اور  حالیہ پاک افغان کشیدگی کے دوران سکیورٹی فورسزکے ساتھ تعاون پر قبائلی عوام کو خراجِ تحسین پیش کیا۔

فیلڈ مارشل نے دہشت گردی کے خلاف جنگ میں خیبرپختونخوا کے بہادرعوام کی قربانیوں اور عزم کوسراہا۔

  پاکستان اپنے تمام ہمسایہ ممالک خصوصاً افغانستان کیساتھ امن چاہتا ہے: فیلڈ مارشل

آئی ایس پی آر کے مطابق فیلڈ مارشل عاصم منیر نے کہا کہ پاکستان اپنی سرزمین پر افغان سرزمین سے دہشتگردی برداشت نہیں کرے گا،  پاکستان اپنے تمام ہمسایہ ممالک خصوصاً افغانستان کے ساتھ امن چاہتا ہے۔

فیلڈ مارشل  نے کہاکہ گزشتہ چند برسوں میں پاکستان نے افغانستان کیساتھ تعلقات بہتر بنانے کیلئے سفارتی اور معاشی اقدامات کیے۔

 افغان حکومت نے دہشتگرد گروہوں کیخلاف کارروائی کے بجائے انہیں سہولت فراہم کی: فیلڈ مارشل

آئی ایس پی آر کے مطابق  فیلڈ مارشل عاصم منیر  کا کہنا تھا کہ افغان طالبان حکومت نے بھارتی سرپرستی یافتہ دہشتگرد گروہوں کے خلاف کارروائی کے بجائے انہیں ہرممکن سہولت فراہم کی۔

فیلڈ مارشل عاصم منیر  نے کہا کہ پاکستان، بالخصوص خیبرپختونخوا کو دہشت گردوں اور ان کے سہولتکاروں سے مکمل طور پرپاک کیا جائےگا۔

آئی ایس پی آر کے مطابق قبائلی عمائدین نے آرمی چیف کے واضح مؤقف کو سراہا اور یقین دلایا کہ  خیبرپختونخوا کے عوام امن واستحکام کیلئے پاک فوج کے ساتھ ہیں،  فتنہ خوارج کی گمراہ کن سوچ کو قبائل میں کوئی پذیرائی حاصل نہیں۔

آئی ایس پی آر کے مطابق  قبائلی عمائدین نے دہشت گردی کے خلاف پاک فوج کی مکمل حمایت کے عزم کا اعادہ کیا اور افغان طالبان کے خلاف بھی واضح مؤقف اختیار کیا۔