ردیف ۔۔ ’’ کچھ بھی نہیں ‘‘

شاعرہ۔۔۔نسرین سید

انتخاب ۔ ڈیلی روشنی نیوز انٹرنیشنل

کیا کرم، کیسی عنایت، کیا عطا، کچھ بھی نہیں

ہم نے جو امید باندھی تھی، ہُوا کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

تیری مرضی ہے مرے مالک، رکھے جس حال میں

کچھ نہیں چاہا بجز تیری رضا، کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

کیا بصیرت، گر نہ دیکھے جلوے اُس کی ذات کے

اُس کو پہچانے نہ گر، ذہنِ رسا کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

کب تلک یہ عزتیں، یہ شہرتیں، یہ خلعتیں

کچھ رہا بھی ہے زمانے میں سدا؟ کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

بے نیازی لے کے آئی ہے مجھے کس موڑ پر

اب تری چشمِ کرم، جور و جفا، کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

کب تلک حائل رہیں گی درمیاں یہ دوریاں

تیرے بن اِس زندگی میں، آ بھی جا، کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

لاکھ دنیا سے چھپا لو اپنی کرنی تم ، مگر

سب عیاں ہے، ذاتِ باری سے چھپا کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

کیوں نہیں لائی بتا اُس گل بدن کی تو مہک؟

ہم کو تیرا فایدہ ، موجِ صبا ، کچھ بھی نہیں

۔۔۔۔۔۔۔۔۔۔۔۔۔۔۔۔۔۔۔۔۔

کب گیا حرفِ دعا نسریںؔ درِ ایجاب تک؟

اس بلائے عشق کا ، ردِ بلا کچھ بھی نہیں

( نسرین سید )