وزیر اطلاعات پنجاب عظمیٰ بخاری نے کہا ہے کہ جیل رولز کو فالو کرنا ہوگا کسی جیل میں کسی سیاسی میٹنگ کی اجازت نہیں۔

جیو نیوز کے پروگرام آج شاہ زیب خانزادہ کے ساتھ میں گفتگو کرتے ہوئے عظمیٰ بخاری کا کہنا تھاکہ جھوٹ بولا گیا کہ اڈیالہ کے باہر ہم پر پانی پھینکا گیا۔

انہوں نے کہا کہ وزیراعلیٰ سہیل آفریدی خط لکھنے سے پہلے کسی وکیل سے پوچھ لیتے، کاش وزیراعلیٰ سہیل آفریدی نے جیل قوانین پڑھ لیے ہوتے، وزیراعلیٰ کا قیدیوں سے ملاقات کے معاملات سے کوئی لینا دینا نہیں۔

ان کا کہنا تھاکہ وزیراعلیٰ پنجاب کو سہیل آفریدی کے خط کا جواب دینے کی ضرورت نہیں، جیل رولز کو فالو کرنا ہوگا کسی جیل میں کسی سیاسی میٹنگ کی اجازت نہیں، بانی پی ٹی آئی کی وکلا سے 420 ملاقاتیں ہوچکی ہیں۔

وزیر اطلاعات پنجاب نے مزید کہا کہ ملاقات کے لیے نہیں جیل کے باہر امن و امان کی صورتحال پیدا کرنے کے لیے جمع ہوتے ہیں، وزیراعلیٰ پنجاب قید میں خود پر بیتی کسی بات کو ڈسکس بھی نہیں کرتیں، ان موصوف کو تو باقاعدہ اٹیج باتھ روم ود کموڈ بناکر دیا گیا ہے۔

عظمیٰ بخاری کا کہنا تھاکہ ملاقات ہوجائے گی لیکن ملاقات کرنے اور ڈرامے میں فرق ہے، بانی پی ٹی آئی کی اہل خانہ سے 189 ملاقاتیں ہوچکی ہیں 190 بھی ہوجائیں گی، حکومت پنجاب نے کسی ملاقات سے نہیں روکا۔

خیال رہے کہ وزیراعلیٰ خیبر پختونخوا سہیل آفریدی نےبانی پی ٹی آئی عمران خان کی بہنوں کو عدالتی اجازت کے باوجود ملاقات سے روکنے پر وزیراعلیٰ پنجاب مریم نواز کو خط لکھا تھا۔