لاہور  :  قومی ہاکی ٹیم کے کھلاڑیوں کے ڈیلی الاؤنس کا مسئلہ پھر سر اٹھانے لگا۔

ذرائع کے مطابق قومی ہاکی ٹیم کے کھلاڑی ڈومیسٹک اور انٹر نیشنل ڈیلی الاؤنس کے منتظر ہیں۔

ذرائع کا بتانا ہے کہ دورہ بنگلا دیش اور پرو ہاکی لیگ کے لیے لگائے جانے والے کیمپس کی ڈومیسٹک ڈیلیز  پلیئرز کو نہیں ملیں،  اسی طرح کھلاڑیوں کو بنگلا دیش کے خلاف سیریز کی انٹر نیشنل ڈیلیز  بھی ادا نہیں کی گئیں۔

ذرائع کے مطابق قومی ہاکی ٹیم کے کھلاڑی پاکستان اسپورٹس بورڈ کی جانب سے بھی کیمپ کے پیسوں کے منتظر ہیں،   پرو ہاکی لیگ کے دوران انٹر نیشنل ڈیلیز کا بھی فیصلہ نہ ہو سکا۔

ذرائع کا بتانا ہے کہ  پرو ہاکی لیگ کے دوران 40 ڈالرز دیے جانے کے حوالے سے پلیئرز ناخوش ہیں،   پی ایس بی نے اپنے ضابطے کے مطابق کھلاڑیوں کو 40 ڈالرز ڈیلیز دینے کا کہا ہے تاہم   پی ایچ ایف کے ضابطے کے مطابق کھلاڑیوں کو 30 ہزار روپے انٹر نیشنل ڈیلی ادا کی جاتی ہے۔

واضح رہے کہ پرو ہاکی لیگ کے لیے پاکستان ہاکی ٹیم آج شب ارجنٹائن کے لیے روانہ ہو گی ۔