وزیر مملکت برائے داخلہ  سینیٹر  طلال  چوہدری نے  کہا ہے کہ  جہاں گورننس  اچھی نہیں وہاں نئے صوبے بالکل  بننے چاہئیں۔

 فیصل آباد میں میڈیا سے گفتگو کرتے ہوئے طلال چوہدری نے کہا کہ  روز  ہمیں سبق دیے جاتے ہیں کہ نئے صوبے بننے چاہئیں، صوبے بالکل نئے بننے چاہئیں،جہاں پر گورننس اچھی نہیں، اگر  چھوٹے صوبے میں گورننس اچھی نہیں تو اس کی گورننس اچھی کرنے کے لیے ضرور سوچنا چاہیے۔

طلال چوہدری کا کہنا تھا کہ  پنجاب کے وسائل دنیا کےکئی ممالک سے کم ہیں، بڑے صوبے میں زیادہ آبادی،گورننس ، صحت  اور تعلیم  بھی بہتر ہے، امن بھی ہے اور  وژن بھی ہے۔

انہوں نے کہا کہ کہا جاتا ہے کسانوں کو فصل کی صحیح قیمت نہیں مل رہی، ملک میں سب محفوظ صوبہ پنجاب ہے، دوسرے صوبوں میں انسان کے لیے اتنی سہولتیں نہیں جتنی پنجاب میں جانوروں کے لیے ہیں۔

وزیر مملکت برائے داخلہ کا کہنا تھا جسے تنقید کرنی ہے وہ کرتے رہیں ہم کام کرتے رہیں گے۔