غزل
شاعر ۔۔۔۔۔۔۔۔۔ صوفی غلام مصطفی تبسم
غم نصیبوں کو ، کسی نے تو پکارا ھو گا
اِس بَھری بزم میں ، کوئی تو ھمارا ھو گا
آج کس یاد سے چَمکی تیری چشمِ پُرنَم ؟؟
جانے یہ ، کس کے مقدر کا ستارا ھو گا
جانے اب حُسن لٹائے گا ، کہاں دولتِ درد
جانے اب کس کو ، غمِ عشق کا یارا ھو گا
تیرے چُھپنے سے چُھپیں گی نہ ھماری یادیں
تُو جہاں ھو گا ، وھیں ذِکر ھمارا ھو گا
یُوں جُدائی تو گوارا تھی ، یہ معلوم نہ تھا
تجھ سے یوں ، مِل کے بچھڑنا بھی گوارا ھو گا
چھوڑ کر آئے تھے ، جب شہرِ تمنا ھم لوگ
مدتوں راہ گزاروں نے ، پکارا ھو گا
ایک طوفاں میں ، قریب آ گئی اپنی منزل
ھم سمجھتے تھے ، بہت دُور کنارا ھو گا
مُسکراتا ھے تو ، اِک آہ نِکل جاتی ھے
یہ تبسمؔ بھی ، کوئی دَرد کا مارا ھو گا
“صُوفی غلام مصطفیٰ تبّسم”
