آئی سی سی ویمنز ورلڈ کپ 2025 میں دفاعی چیمپئن آسٹریلیا نے پاکستان کو 107 رنز سے ہرا دیا، یہ گرین شرٹس کی ایونٹ میں مسلسل تیسری شکست ہے۔

آسٹریلوی ویمنز ٹیم کے 222 رنزکے ہدف کے جواب میں پاکستان ویمنز ٹیم 114 رنز پر ڈھیر ہوگئی۔

کولمبو میں کھیلے گئے میچ میں پاکستان ویمنز  ٹیم نے ٹاس جیت کر آسٹریلیا کو بیٹنگ کی دعوت دی۔

آسٹریلیا کی اننگز

پاکستانی بولرز نے شاندار آغاز  فراہم کیا اور صرف 76 رنز پر آسٹریلیا کی 7 وکٹیں گرا دیں لیکن اس کے بعد بیتھ مونی نے شاندار سنچری بنائی جبکہ الانا کنگ  نے 51 رنز  کی اننگز کھیلی۔

دونوں کے درمیان نویں وکٹ پر 106 رنز کی شراکت داری بنائی۔ یوں آسٹریلیا نے مقررہ 50 اوورز میں 9  وکٹ پر 221 رنز بنائے ۔

پاکستان کی جانب سے  نشرہ سندھو نے 3 ، فاطمہ ثنا اور رامین شمیم نے 2،2 وکٹیں حاصل کیں۔

پاکستان کی اننگز

222 رنز کے ہدف کے تعاقب میں پاکستان کی بیٹنگ لائن ایک بار پھر لڑکھڑا گئی۔قومی ٹیم کی پہلی وکٹ 8رن پر گرئی اور پھر آدھی ٹیم 31 رنز پر پویلین لوٹ گئی جبکہ پوری ٹیم 37 ویں اوور میں  114 رنز بنا کرآؤٹ ہوگئی۔

پاکستان کی جانب سے  سدرہ امین نے 35 رنز بنائے جبکہ کینگروز کی جانب سے کم گیرتھ نے 3 کھلاڑیوں آؤٹ کیا۔

یوں آسٹریلیا نے میچ 107 رنز سے جیت لیا۔ یہ پاکستان ویمنز ٹیم کی آئی سی سی ورلڈکپ2025 میں مسلسل تیسری شکست ہے۔

اس سے قبل پاکستان ویمنز ٹیم کو بنگلادیش اور پھر بھارت سے شکست ہوئی تھی۔