قومی کرکٹر شعیب ملک کی اہلیہ و سابق بھارتی ٹینس اسٹار ثانیہ مرزا نے صحافی کو کرارا جواب دے دیا۔
بھارتی میڈیا رپورٹس کے مطابق ایک تقریب کے دوران ثانیہ مرزا نے شعیب ملک کا حوالہ دیتے ہوئے صحافی کے سوال پر جواب دیتے ہوئے کہا کہ ’آپ اگر شعیب ملک سے یہی سوال پوچھیں گے تو میں بھی آپ کو جواب دوں گی۔‘
ثانیہ مرزا نے گزشتہ روز بھارت میں منعقد ایک تقریب میں شرکت کی جہاں ماؤں کی جدوجہد اور کامیابیوں کو اجاگر کرنے کے لیے ایک مہم چلائی جارہی تھی۔
انہوں نے ماؤں کی حوصلہ افزائی، کامیابیوں اور جرأت کو سراہا۔
تقریب میں ثانیہ مرزا نے کہا کہ ایک ماں اور کھلاڑی ہونے کی حیثیت سے میں خود بہت سے چیلنجز کا سامنا کرچکی ہوں، مجھے اس مہم کا حصہ ہونے پر فخر ہے کہ میں خواتین کی فلاح کے لیے کام کرسکوں۔
اسی دوران صحافی نے سوال کیا کہ ’آپ ایک بچے کے ساتھ اپنے کیریئر کو کیسے مینج کرتی ہیں۔؟‘
ثانیہ مرزا نے صحافی کو کرارا جواب دیتے ہوئے کہا کہ ’جیسے وہ (شعیب ملک) مینج کرتے ہیں ویسے ہی میں مینج کرتی ہوں، آپ اگر شعیب ملک سے یہی سوال پوچھیں گے تو میں بھی آپ کے سوال کا جواب دوں گی۔‘
واضح رہے کہ شعیب ملک اور ثانیہ مرزا 2010 میں رشتہ ازدواج میں منسلک ہوئے، 30 اکتوبر 2018 کو ان کے ہاں بیٹے کی پیدائش ہوئی جس کا نام انہوں نے اذہان مرزا ملک رکھا۔
ثانیہ مرزا بیٹے اذہان کے ساتھ انسٹاگرام پر اکثر تصاویر شیئر کرتی رہتی ہیں جسے ان کے مداح بھی پسند کرتے ہیں۔
خیال رہے کہ گزشتہ برس سے شعیب ملک اور بھارت کی سابق ٹینس اسٹار ثانیہ مرزا کے درمیان طلاق کی خبریں گردش کررہی تھیں، تاہم دونوں کی جانب سے باقاعدہ طور پر اس کی تردید یا تصدیق نہیں کی گئی۔
