اللہ مجھ سے محبت کرتا ہے ؟
تحریر ۔۔۔۔۔۔۔۔۔ سید اسلم شاہ
انتخاب ۔۔۔۔۔۔۔ محمد جاوید عظیمی
ہالینڈ(ڈیلی روشنی نیوز انٹرنیشنل ۔۔۔ اللہ مجھ سے محبت کرتا ہے ؟۔۔۔ تحریر ۔۔۔۔ سید اسلم شاہ۔۔۔ انتخاب ۔۔۔ محمد جاوید عظیمی)یہ سوال اکثر میرے ذہن میں گردش کرتا ـ پھر ایک دن مجھے خیال آیا کہ میرا رب جن بندوں کو زیادہ چاہتا ہے ان کے بارے میں تو اس نے آیتیں اتاریں ہیں سو میں قرآنِ مجید کھول کر بیٹھ گیا !
میں نے ڈھونڈا تو پہلی آیت ملی
“وہ متقین سے محبت کرتا ہے”°
مجھے ملال ہوا مجھ میں تو نام کا بھی تقوی نہیں
پھر میں نے آگے پڑھا کہ
وہ ” صابرین ” کو محبوب رکھتا ہے !
مجھے اپنے بے صبرا ہونے پر شدید افسوس ہوا !
مزید آگےبڑھا تو جانا
” اللہ مجاھدین ” سے محبت کرتاہے ـ
میں نے جانا کہ ایسی سعادت بھی نہیں مجھے !
پھر پڑھا کہ وہ “احسان” کرنے والوں کو پسند کرتا ہے ـ مگر میں اس سے بھی بہت دور ہوں !
پھر میں نےاپنی تلاش ترک کرنے کا فیصلہ کیا اس ڈر سے کہ اب شاید میرے پاس ایسا کچھ بھی نہیں جس کے باعث الله مجھ سے محبت کرے ـ
میں نے اپنے اعمال کھنگالے تو وہ سب فتور اور گناہوں سے آلودہ تھے !
پھر میں مصحف بند کرنے لگا کہ اچانک میری نظر الله کے فرمان:ـ
“ان الله یحب التوابین”
پر پڑی یعنی ـ
(بیشک الله توبہ کرنے والوں سے محبت رکھتا ہے)°
سو میں نے اپنا مقام پا لیا !
