ابوظبی: ایشیا کپ 2025 کے افتتاحی میچ میں افغانستان نے ہانگ کانگ  کو 94 رنز سے شکست دے دی۔

افغانستان کے 189 رنز کے ہدف کے تعاقب میں ہانگ کانگ کی ٹیم مقررہ 20 اوورز میں 9 وکٹوں پر 94 رنز بناسکی۔

ابوظبی میں کھیلے  گئے میچ میں افغانستان کے کپتان راشد خان نے ہانگ کانگ کے خلاف ٹاس جیت کر پہلے بیٹنگ کرنے کا فیصلہ کیا۔

افغانستان کی اننگز

افغانستان نے صدیق اللہ اور عظمت اللہ کی شاندار بیٹنگ کی بدولت مقررہ 20 اوورز میں 6 وکٹوں پر 188 رنز بنائے۔

افغانستان کی جانب سے  صدیق اللہ 73 رنز بناکر نمایاں رہے جبکہ عظمت اللہ نے 21 گیندوں پر 53 رنز کی برق رفتار اننگز کھیلی۔ محمد نبی نے 33 رنز اسکور کیے۔

اس کے علاوہ رحمان اللہ گرباز 8، ابراہیم زادران 1، گلبدین 5 اور کریم جنت 2 رنز بناکر آؤٹ ہوئے۔

ہانگ کانگ کی جانب سے آیوش شکلا اور کنچت شاہ نے 2،2 وکٹیں حاصل کیں۔

ہانگ کانگ کی اننگز

افغانستان کے 189 رنز کے ہدف کے تعاقب میں ہانگ کانگ کی بیٹنگ لائن جم کر نہ کھیل سکی اور مقررہ 20 اوورز میں صرف 9 وکٹوں پر 94 رنز ہی بناسکی۔

بابر حیات 39 اورکپتان یاصم مرتضیٰ 16 رنز کے ساتھ نمایاں رہے۔ باقی کوئی بھی بیٹر ڈبل فیگرز میں داخل نہ ہوسکا۔

افغانستان کی جانب سے فضل الحق اور گلبدین نائب نے 2،2 وکٹیں حاصل کیں جبکہ عظمت اللہ ، راشد خان اور نور احمد نے ایک، ایک کھلاڑی کو آؤٹ کیا۔

واضح رہے کہ دونوں ٹیمیں ایشیا کپ کے گروپ بی میں شامل ہیں۔

پاکستان ٹیم ایونٹ میں اپنی مہم کا آغاز جمعے کو عمان کے خلاف میچ سے کرے گا۔