بنگلادیش کے اسٹار آل راؤنڈر شکیب الحسن نے ٹیسٹ اور ٹی ٹوئنٹی انٹرنیشنلز سے ریٹائرمنٹ کا اعلان کر دیا۔
بنگلادیشی ٹیم ان دنوں بھارت کے دورے پر ہے جہاں دونوں ٹیموں کے درمیان ٹیسٹ سیریز جاری ہے۔
کان پور میں دوسرے ٹیسٹ سے قبل شکیب الحسن نے میڈیا سے گفتگو کرتے ہوئے بتایا کہ رواں سال جون میں ہونے والے ٹی ٹوئنٹی ورلڈکپ میں وہ اس فارمیٹ میں بنگلادیش کے لیے اپنا آخری میچ کھیل چکے ہیں۔
شکیب نے بتایا کہ اکتوبر میں ڈھاکا میں جنوبی افریقا کے خلاف شیڈول ٹیسٹ ان کے کیریئر کا آخری ٹیسٹ میچ ہوگا، ٹی ٹوئنٹی کے بعد وہ اس فارمیٹ سے بھی ریٹائر ہوجائیں گے۔
واضح رہے کہ جنوبی افریقا نے بنگلادیش میں جاری سیاسی کشیدگی کی وجہ سے اب تک اپنی ٹیم کو سیریز کے لیے سکیورٹی کلیئرنس نہیں دی ۔
اگر جنوبی افریقا سیریز نہیں ہوتی تو کان پور میں جمعہ سے شروع ہونے والا بھارت کے خلاف ٹیسٹ شکیب الحسن کا آخری ٹیسٹ ہو گا لیکن امید ہے کہ جنوبی افریقا کیخلاف ٹیسٹ سیریز شیڈول کے مطابق ہوگی۔
اس کے علاوہ شکیب الحسن نے یہ بھی تصدیق کی کہ 2025 کی چیمپئنز ٹرافی کے بعد وہ ون ڈے کرکٹ سے بھی ریٹائر ہوجائیں گے۔
شکیب الحسن کا کہنا تھا کہ میں اس فیصلے سے خوش ہوں، مجھے اپنی زندگی میں کوئی پچھتاوا نہیں ہے، مجھے لگتا ہے کہ یہ میرے اور بنگلا دیش کرکٹ کے لیے صحیح وقت ہے۔
واضح رہے کہ شکیب الحسن 70 ٹیسٹ میچز میں بنگلادیش کی نمائندگی کرچکے ہیں، جس میں انہوں نے 4600 رنز اور 242 وکٹیں لیں۔
ٹی ٹوئنٹی انٹرنیشنلز کی بات کریں تو انہوں نے بنگلادیش کے لیے 129 میچز کھیلے جس میں 2551 رنز اور 149 وکٹیں شامل ہیں۔
اس کے علاوہ شکیب الحسن 247 ون ڈے میچز میں بھی بنگلادیش کی نمائندگی کرچکے ہیں۔
یاد رہے کہ گزشتہ ماہ بنگلا دیش کے اسٹار کرکٹ آل راؤنڈر اور عوامی لیگ سے تعلق رکھنے والے سابق رکن اسمبلی شکیب الحسن پر ڈھاکا میں قتل کا مقدمہ درج کیا گیا تھا۔
بنگلادیشی میڈیا کے مطابق شکیب الحسن پر ڈھاکا میں گارمنٹ فیکٹری کے ملازم کے قتل کا الزام عائد کیا گیا ، مقتول کے والد نے ڈھاکا کے تھانے میں شکیب الحسن کے خلاف قتل کا مقدمہ درج کرایا۔
