بنگلا دیش نے 3 ٹی ٹوئنٹی میچز کی سیریز کے دوسرے میچ میں پاکستان کو 8 رنز سے شکست دے کر سیریزمیں دو صفر کی فیصلہ کن برتری حاصل کرلی۔

میر پور کے شیر بنگلا اسٹیڈیم میں کھیلے گئے دوسرے ٹی ٹوئنٹی میچ میں پاکستان نے ٹاس جیت کر پہلے بولنگ کا فیصلہ کیا۔

بنگلا دیش کی ٹیم مقررہ 20 اوورز کی آخری گیند پر 133رنز  پر  آؤٹ ہوگئی،  ذاکر علی نے 55 اور مہدی حسن نے 33 رنز کی اننگز کھیلیں۔

پاکستان کی جانب سے سلمان مرزا ،عباس آفریدی  اور  احمد دانیال نے 2،2 وکٹیں حاصل کیں، فہیم اشرف اور  محمد نواز  ایک،ایک وکٹ لینے میں کامیاب رہے۔

بنگلادیش کے 134 رنز کے ہدف کے جواب میں پاکستان کی پوری ٹیم آخری اوور میں 125 رنز بنا کر آؤٹ ہوگئی۔

پاکستان کی جانب سے فہیم اشرف کے علاوہ کوئی بھی بیٹر وکٹ پر نہ ٹھہر سکا، فہیم اشرف نے 32 گیندوں پر 51 رنز کی اننگ کھیلی۔ ان کے علاوہ عباس آفریدی نے 19 اور دانیال نے 17 رنز بنائے۔

بنگلادیش کی جانب سے شریف الاسلام نے 3 اور مہدی حسن نے 2 وکٹیں حاصل کیں۔

قومی ٹیم میں آج  ایک تبدیلی کی گئی ، ابرار  احمد کی جگہ احمد دانیال کو ٹیم میں شامل کیا گیا۔

پاکستان ٹی ٹوئنٹی ٹیم میں اوپنر بلے باز فخرزمان، صائم ایوب، محمد حارث اور کپتان سلمان آغا شامل ہیں۔ حسن نواز، محمد نواز ، خوشدل شاہ، فہیم اشرف، احمد دانیال ،سلمان مرزا اور عباس آفریدی بھی پلیئنگ الیون کا حصہ تھے۔

بنگلادیش کی ٹیم میں کپتان لٹن داس، تنزید حسن،  پرویز حسین اور  توحید ہردوئی  سمیت دیگر کھلاڑی  پلینگ الیون کا حصہ تھے۔