شوق کا راستہ حقیقت کا راستہ ہے

تحریر۔۔۔  حضرت واصف علی واصف رح

ہالینڈ(ڈیلی روشنی نیوز انٹرنیشنل )معراج کے بعد کافروں نے حضرت ابوبکر صدیق ؓ  سے کہا ،

کہ آپ کے  پیغمبرﷺ   کہتے ہیں کہ انہیں معراج ہوا ہے ۔۔۔،

  تو حضرت ابوبکرؓ  نے جواب دیا کہ

   “اگر یہ  حضورپاکﷺ نے فرمایا ہے ، تو پھر بالکل ٹھیک ہی ہے ۔”

آپ حضور پاکﷺ کے یہ درجے دیکھو ،  کہ اتنے عرصہ کے بعد بھی ، لوگوں کے دلوں پر ، حکمرانی آپﷺ  ہی کی ہے ۔

  کائنات میں آج تک کسی انسان کی اتنی تعریف نہیں کی گئی جتنی آپؐ  کی ۔

  آپؐ  کےزمانے میں بھی ، اور آپؐ کے بعد کے زمانے میں بھی ۔

 یہ سب اللّہ کی شانیں ہیں ۔ اللّہ اس کو مزید بلند کرے گا  ۔ اس لئے آپ ان باتوں کو مت سوچا کرو ۔

    بس آپ شوق سے چلتے جاوٴ۔۔۔۔ اور یاد رکھنا ، شوق سے کبھی غافل نہ ہونا ۔

  شوق کے پاس ہی اللّہ ہے ۔

 بندے کے پاس اللّہ نہیں ہے ۔ اللّہ کہاں ہے  ؟ شوق کے پاس ہے ۔  اللّہ صاحبانِ  شوق کے پاس ہے  ۔

اپنے شوق کی حفاظت ، دعا حاصل کر کے کیا کرو ۔ اپنے شوق کی حفاظت کیسے کرو ؟ دعاؤں کے ساتھ ، درخواست کے ساتھ ، التجا کے ساتھ ۔۔۔

   اور آپ کے شوق میں اللّہ کے علاوہ کسی اور کا  وجود ،  موجود نہ ہو ۔

 جب آپ صاحبانِ شوق بن جاوٴ  ، تو پھر خیال رکھنا ، کہ لوگوں کے حقوق مجروح  نہ ہوں ۔

 اور یہ پکی بات ہے کہ شوق کا راستہ حقیقت کا راستہ ہے  ۔

  حضرت واصف علی واصف رح

 ( گفتگو 5 _ صفحہ : 233 )