شیطان سے بچنا ۔۔۔
انتخاب ۔۔۔محمد جاوید عظیمی
ہالینڈ(ڈیلی روشنی نیوز انٹرنیشنل۔۔۔ شیطان سے بچنا ۔۔۔ انتخاب ۔۔۔محمد جاوید عظیمی)ایک استاد کے پاس ایک دفعہ ایک طالبِ علم آیا جو دینی علوم سیکھتا رہا۔ کچھ عرصہ پڑھنے کے بعد جب وہ اپنے وطن واپس جانے لگا تو وہ استاد اس سے کہنے لگے:
میاں! ایک بات بتاتے جاؤ۔
وہ کہنے لگا: دریافت کیجئے، میں بتانے کے لیے تیار ہوں۔
وہ کہنے لگے: اچھا یہ تو بتاؤ، کیا تمہارے ہاں شیطان بھی ہوتا ہے؟
وہ کہنے لگا: حضور! شیطان کہاں نہیں ہوتا۔ شیطان تو ہر جگہ ہوتا ہے۔
انہوں نے کہا: اچھا، جب تم نے اللہ تعالیٰ سے دوستی لگانی چاہی اور شیطان نے تمہیں ورغلا دیا تو تم کیا کرو گے؟
اس نے کہا: میں شیطان کا مقابلہ کروں گا۔
وہ کہنے لگے: فرض کرو تم نے شیطان کا مقابلہ کیا اور وہ بھاگ گیا، لیکن پھر تم نے اللہ تعالیٰ کے قرب کے حصول کے لیے جدوجہد کی اور پھر تمہیں شیطان نے روک لیا تو کیا کرو گے؟
اس نے کہا: میں پھر مقابلہ کروں گا۔
وہ کہنے لگے: اچھا مان لیا تم نے دوسری دفعہ بھی اسے بھگا دیا۔ لیکن اگر تیسری دفعہ وہ پھر تم پر حملہ آور ہو گیا اور اس نے تمہیں اللہ تعالیٰ کے قرب کی طرف بڑھنے نہ دیا تو کیا کرو گے؟
وہ کچھ حیران سا ہو گیا مگر کہنے لگا: میرے پاس سوائے اس کے کیا علاج ہے کہ میں پھر اس کا مقابلہ کروں۔
وہ کہنے لگے: اگر ساری عمر تم شیطان سے مقابلہ ہی کرتے رہو گے تو اللہ تک کب پہنچو گے؟
وہ لاجواب ہو کر خاموش ہو گیا۔
اس پر اس استاد نے کہا: اچھا یہ تو بتاؤ، اگر تم اپنے کسی دوست سے ملنے جاؤ اور اس نے ایک کتا بطورِ پہرہ دار رکھا ہوا ہو اور جب تم اس کے دروازے پر پہنچنے لگو تو وہ تمہاری ایڑی پکڑ لے تو تم کیا کرو گے؟
وہ کہنے لگا: کتے کو ماروں گا اور کیا کروں گا۔
وہ کہنے لگے: فرض کرو تم نے اسے مارا اور وہ ہٹ گیا، لیکن اگر دوبارہ تم نے اس دوست سے ملنے کے لیے اپنا قدم آگے بڑھایا اور پھر اس نے تمہیں آ پکڑا تو کیا کرو گے؟
وہ کہنے لگا: میں پھر ڈنڈا اٹھاؤں گا اور اسے ماروں گا۔
انہوں نے کہا: اچھا، تیسری بار پھر وہ تم پر حملہ آور ہو گیا تو تم کیا کرو گے؟
وہ کہنے لگا: اگر وہ کسی طرح باز نہ آیا تو میں اپنے دوست کو آواز دوں گا کہ ذرا باہر نکلنا۔ یہ تمہارا کتا مجھے آگے بڑھنے نہیں دیتا، اسے سنبھال لو۔
وہ کہنے لگے: بس یہی گُر شیطان کے مقابلے میں بھی اختیار کرنا۔ اور جب تم اس کی تدابیر سے بچ نہ سکو تو اللہ سے یہی کہنا کہ وہ تمہیں اپنے قرب میں بڑھنے دے۔۔۔
تم اس کا ہاتھ کیوں نہیں پکڑ لیتے جس کے قبضۂ قدرت میں یہ تمام چیزیں ہیں؟
اگر تم اس سے دوستی لگا لو تو تمہیں ان چیزوں کا کوئی خطرہ نہ رہے گا اور ہر تباہی اور مصیبت سے بچے رہو گے۔
یہ وہ علاج ہے جو قرآنِ کریم نے بتایا ہے…!!!
