غزل
شاعر۔۔۔شہزادتابش
اذیت جیسے غربت میں حقیقت بن کے رہتی ہے
جہالت ویسے فطرت میں ارادت بن کے رہتی ہے
رہائی کا علم لے کر گزاری ہے سلاسل میں
اقامت میری فطرت میں بغاوت بن کے رہتی ہے
نہ یوں مجھ پر ہنسو عہد نوی کے رازدانوں تم
مرے اندر نئی دنیا حرارت بن کے رہتی ہے
جلاتا ہوں محبت سے تہی دامن چراغوں کو
اخوت جذبۂ دل میں عقیدت بن کے رہتی ہے
مجھے معلوم ہے تجھ کو خبر ہے اس حقیقت کی
تری الفت ہی دھڑکن کی ضمانت بن کے رہتی ہے
منازل کے لیے ادوار بھی راسخ ضروری ہیں
وگرنہ ہستئ کامل ملامت بن کے رہتی ہے
کہیں تابشِ میں گھر جاؤں کبھی ایام گردش میں
جہان عزم نو مجھ میں جسارت بن کے رہتی ہے
شہزاد تابشِ
کتاب: چراغِ نیم جاں
لاھور
پاکستان
