غزل
شاعر۔۔۔شہزاد تابش
درویش کی پکار پہ خود مرثیہ پڑھا
دنیا ترے وقار پہ خود مرثیہ پڑھا
پہلے تری جفاؤں کا دل نے منایا سوگ
پھر اپنے اعتبار پہ خود مرثیہ پڑھا
اتنے شدید وار تھے پشت غنیم پر
ہر ایک یار غار پہ خود مرثیہ پڑھا
مسلے ہوئے گلاب کی چیخ و پکار پر
پھولوں کے لالہ زار پہ خود مرثیہ پڑھا
ہم نے دل تباہ کی بے چارگی لیے
الفت کے ہر مزار پہ خود مرثیہ پڑھا
کلیوں نے کیوں بہار کی آمد سے پیش تر
پھولوں کی رہ گزار پہ خود مرثیہ پڑھا
مجبور مامتا نے شرافت کو بیچ کر
دامن کے تار تار پہ خود مرثیہ پڑھا
ناکام حسرتوں کے نشیب و فراز میں
چڑھتے ہوئے خمار پہ خود مرثیہ پڑھا
شعلوں کی زد میں چیختی جنگلی حیات نے
شعلوں کے ہر شرار پہ خود مرثیہ پڑھا
متشاعروں کو دیکھا جو اہلِ ادب کے بیچ
لفظوں کے کاروبار پہ خود مرثیہ پڑھا
تابشِ جنون و عقل کی تکرار تھی فضول
دونوں کے اختصار پہ خود مرثیہ پڑھا
شہزاد تابشِ
لاھور
پاکستان
