غزل
شاعر ۔۔۔۔۔۔۔۔۔ بہزاد زیب
یہ خاکِ جاں ہے کسی کی پُکار، یُوں بھی تو
ہَمیں تو ہونا ہے آخِر غُبار، یُوں بھی تو
نہ میرے دِل کو ہے آیا قَرار، یُوں بھی تو
چلے ہو تُم بھی مَسیحائے کار، یُوں بھی تو
میں کیسے کہہ دُوں مجھے چھوڑ کر نہیں جانا
نہ تُجھ پہ ہے مرا کچھ اِخْتِیار، یُوں بھی تو
نہ پُو چھ مُجھ سے مری چَشْمِ تَر کے اَفسانے
کہ ہے یہ زِیست بڑی اَشک بار، یُوں بھی تو
ہمارے نام سے مَنسُوب ہوگئی وَحْشت
کَٹی نہ ہَم سے شبِ اِنتِظار، یُوں بھی تو
عَجَب نہیں ہے جو دِل کو قَرار آئے نہیں
ترا فِراق ہے جاں کا حِصار، یُوں بھی تو
خُوشا نَصِیب ! کہ تَنہائی ہَم کو راس آئی
تھے اَنْجُمَن میں بہت بـے قَرار، یُوں بھی تو
کسی کے ہِجْر میں مرنا کوئی کَمال نہیں
کہ غَم سے مرتا ہے ہر خاکسار، یُوں بھی تو
بَنامِ ضَبْطِ جُنُوں پی گئے ہَم اَشک اَپنے
تھے اَپنے آپ سے ہم شَرْم سار، یُوں بھی تو
فریبِ وعدہِ فَرْدا پہ کَیا بھروسہ ہو
کَٹی ہے زِیست پَسِ اِنتِظار، یُوں بھی تو
خِزاں کی زَد میں رہے اَب کہ گُلِستاں اَپنا
کہ بـے کَلی سی رہی ہے بَہار، یُوں بھی تو
بَچا کے لائے ہیں ہَم خُود کو موجِ دَرْیا سے
مگر ہے ریت پہ اَپنا مَزار، یُوں بھی تو
کَٹی ہے عُمْر کڑی دُھوپ کے تَعاقُب میں
مِلا نہ کوئی شَجَر سایہ دَار، یُوں بھی تو
اِسی اُمّید پہ دیکھے گا وہ پَلَٹ کے ہَمیں
پَلَٹ کے دیکھتے ہَیں بار بار، یُوں بھی تو
تو کِیوں نہ زِندگی تنہا گُزار دی جائے
کسی کے عِشْق میں ہونا ہے خوار، یُوں بھی تو
ضَمیر بَیچ کے جیتے تو کیا ہی جیتے ہَم
وفا کے ہَم نہیں ہَیں دَعوے دَار، یُوں بھی تو
شِکَستِ دِل کا تَماشہ بھی دیکھ لے دُنیا
بَپا ہے زِیست میں اِک اِنْتِشار، یُوں بھی تو
اَنا کی بِھینٹ چَڑھا دِیں رَفاقتیں ساری
ہَیں تیرے چاہنے والے ہَزار، یُوں بھی تو
بُجھا دو بُجھتی ہُوئی آنکھ کے یہ سب مَنْظَر
تھا بوجھ خواب کا اَب ناگَوار، یُوں بھی تو
جسے ہَم اَپنی بَلَنْدی کا اوج کہتے رَہے
تھا وہ بھی گَردِ رہِ روزگار، یُوں بھی تو
گُزر ہی جائے گی یہ بـے کلی کی رُت بہزادؔ
خِزاں کے بعد ہے فصلِ بَہار، یُوں بھی تو
بہزاد زیب
