غزل

شاعر  ۔۔۔۔۔۔  خمار بارہ بنکوی

مجھ کو شکست دل کا  مزا  یاد آ گیا

تم کیوں اداس ہو گئے  کیا یاد آ  گیا

کہنے کو زندگی تھی بہت مختصر مگر

کچھ یوں بسر  ہوئی کہ خدا  یاد  آ گیا

واعظ  سلام لے کہ چلا میکدے  کو میں

فردوس گمشدہ  کا  پتہ  یاد  آ  گیا

برسے بغیر ہی جو گھٹا گھر کے کھل گئی

اک بیوفا  کا  عہد وفا  یاد  آ  گیا

مانگیں گے اب دعا کہ اسے بھول  جائیں ہم

لیکن جو وہ  بوقت  دعا  یاد  آ  گیا

حیرت ہے تم کو دیکھ کے مسجد میں اے  خمار

کیا بات ہو گئی جو خدا  یاد  آ   گیا

خمار بارہ بنکوی

وفات   19 فروری 1999