فرانس میں پاکستان کی سفیر ممتاز زہرہ بلوچ کا اینی لاور ڈیس کامبن کی دعوت پر انٹرنیشنل ولیج آف گیسٹرونومی پیرس کا دورہ

فرانس (ڈیلی روشنی نیوز انٹرنیشنل ۔۔۔ رپورٹ۔۔۔ منیر احمد ملک بیورو چیف پیرس فرانس)فرانس میں پاکستان کی سفیر ممتاز زہرہ بلوچ نے اینی لاور ڈیس کامبن کی دعوت پر انٹرنیشنل ولیج آف گیسٹرونومی پیرس کا دورہ کیا۔ پاکستان کے سفارت خانہ سے جاری بیان کے مطابق یہ پیرس میں 2016 کے بعد گیسٹرونومی کی منعقدہ سب سے بڑی تقریبات میں سے ایک ہے اور اس کا مقصد دنیا بھر سے کھانے کی بھرپور روایات کو منانا ہے۔ پاکستان پویلین کا افتتاح کرتے ہوئے سفیر ممتاز زہرہ بلوچ نے پاکستان کے بھرپور ثقافتی ورثے اور ثقافت پر روشنی ڈالی۔ انہوں نے دنیا بھر کے ممالک کے کھانوں اور ثقافتوں کو فروغ دینے کے لیے بین الاقوامی گیسٹرونومی فیسٹیول کے انعقاد کی روایت کو سراہا۔ اس سال کے میلے میں پاکستان کی شرکت سفارت خانہ کی جانب سے فرانس میں پاکستان کی ثقافت اور کھانوں کو مقبول بنانے کے وژن کے ساتھ عوامی سفارت کاری کے اقدامات کے سلسلہ کا حصہ ہے۔ فیسٹیول میں پاکستان کا پویلین توجہ کا مرکز بنا رہا جہاںکھانے کے شوقین پاکستانی کھانوں سے لطف اندوز ہوئے اور پاکستان کے روایتی کھانوں کے بارے میں جاننے کے لیے بڑی تعداد میں آئے۔ نمائش میں موجود لوگوں نے لذیذ اور میٹھے پکوانوں کے تنوع کو بھی سراہا جن میں چکن بریانی، چنا چاٹ، چکن سیخ کباب، سبزی کے سموسے، گلاب جامن، جلیبی کے ساتھ ساتھ مشہور مشروب روح افزا اور آم کا جوس شامل تھا۔ انہوں نے کھانا پکانے کے عمل، استعمال شدہ اجزاءاور پکوان کی ترکیب میں گہری دلچسپی ظاہر کی۔ اس سال پاکستان کا سفارت خانہ اس میگا ایونٹ میں تقریباً 62 دیگر ممالک اور فرانسیسی خطوں کے ساتھ شرکت کر رہا ہے۔ ایونٹ چار روز تک جاری رہے گا اور توقع ہے کہ روزانہ دس ہزار سے زائد افراد اس میں شریک ہونگے۔ سفیر ممتاز زہرہ بلوچ نے تقریب کے انعقاد  پر سفارت خانے کے جذبے اور محنت کو بھی سراہا۔                رپورٹ منیر احمد ملک بیورو چیف پیرس فرانس