دنیا بھر میں پیغام رسانی کی مقبول ایپلی کیشن واٹس ایپ نے 2025 کے پہلے 6 ماہ کے دوران دنیا بھر میں فراڈ اور جعل سازی کے 68 لاکھ اکاؤنٹس حذف کردیے۔

غیر ملکی خبر ایجنسی کے مطابق منظم جرائم پیشہ گروہ یہ اکاؤنٹس چلاتے تھے اور مختلف ممالک میں لوگوں کو دھوکا دینے کے لیے استعمال کیے جاتے تھے۔

میٹا کے مطابق یہ جعلی اکاؤنٹس زیادہ تر جنوب مشرقی ایشیائی ممالک جیسے میانمار، کمبوڈیا اور تھائی لینڈ میں سرگرم اسکیم سینٹرز سے منسلک تھے۔

میٹا نے اس اعلان کے ساتھ واٹس ایپ پر نئی حفاظتی خصوصیات بھی متعارف کروائی ہیں، جیسے کہ جب کوئی نامعلوم شخص کسی صارف کو گروپ چیٹ میں شامل کرے تو اسے فوری الرٹ نوٹیفکیشن موصول ہوگا۔

کمپنی کا کہنا ہے کہ یہ اقدامات اس بڑھتے ہوئے رجحان کو روکنے کے لیے ہیں جس میں جعل ساز واٹس ایپ اکاؤنٹس کو ہائی جیک کرتے یا گروپ چیٹس میں جعلی سرمایہ کاری اسکیموں کی تشہیر کرتے ہیں۔

میٹا نے انکشاف کیا کہ کچھ اسکیمرز نے مصنوعی ذہانت کے ٹولز کا استعمال کر کے متاثرین کو بیوقوف بنانے والے پیغامات تیار کیے۔

خبر ایجنسی کی رپورٹ کے مطابق جنوب مشرقی ایشیا کے کئی ممالک میں حکام نے عوام کو خبردار کیا ہے کہ وہ ایسے شکوک و شبہات والے پیغامات سے ہوشیار رہیں اور اپنے واٹس ایپ اکاؤنٹس کی حفاظت کے لیے ٹو اسٹیپ ویریفکیشن جیسے سکیورٹی فیچرز کو ضرور فعال کریں۔