آئی سی سی ٹی 20 ورلڈکپ میں بھارت کے خلاف شکست پر قومی ٹیم کے کھلاڑیوں پر 50 لاکھ جرمانے پر عملدرآمد تاحال نہیں ہوسکا۔

ذرائع کے مطابق 15 فروری کو روایتی حریف بھارت کے ہاتھوں قومی ٹیم کی 61 رنز کی شکست کے بعد ناقص پرفارمنس پر میچ کھیلنے والی ٹیم کے ہر کھلاڑی کو 50 لاکھ فی کس جرمانے کی تجویز پیش کی گئی تھی جس پر فی الحال عملدرآمد نہیں ہوا۔

بورڈ کے ذرائع کے مطابق چیئرمین پی سی بی محسن نقوی حالیہ عرصے میں قومی ٹیم کے کھلاڑیوں کی پرفارمنس کے تناظر میں مستقبل میں مزید سخت اقدامات کا ارادہ رکھتے ہیں۔

چیئرمین پی سی بی نے کھلاڑیوں کو ہر سطح پر مراعات بورڈ کی سطح پر دینے کا اعلان کیا، پاکستان سپر لیگ کی تاریخ میں پہلی بار آکشن متعارف کروایا جس سے کھلاڑیوں کو کروڑوں روپے میں فرنچائزز نے خریدا تاہم اس کے باوجود عالمی مقابلوں میں کھلاڑیوں کی پرفارمنس مایوس کن حد تک تنزلی کی جانب گامزن ہے۔

ذرائع نے بتایا کہ بورڈ میں پرفارمنس کی بنیاد پر مراعات کھلاڑیوں کو دی جائیں گی البتہ خراب کارکردگی پر ان کی مراعات اور پیسوں میں کٹوتی کے امکان کو مستقبل میں خارج ازامکان قرار نہیں دیا جاسکتا۔

بورڈ قومی ٹیم کے کھلاڑیوں کا ہر طرح سے خیال رکھتا ہے اور انہیں سینٹرل کنٹریکٹ کی مد میں سال میں کروڑوں روپے کے معاہدے میں شامل کیا جاتا ہے۔

اب مستقبل میں ناقص پرفارمنس پر کھلاڑیوں کے گرد گھیرا تنگ کیا جائے گا، ان کو مراعات اور اچھے معاوضے عمدہ پرفارمنس کے لیے دیے جاتے ہیں، ایسا نہ ہونے کی صورت میں کھلاڑیوں کو جوابدہ ہونا پڑے گا۔