۔۔۔۔۔۔۔ غزل۔۔۔۔۔۔۔۔۔

شاعر  ۔۔۔۔۔۔۔۔۔ قیصر الجعفری

تمہارے شہر کا موسم بڑا سہانا لگے

میں ایک شام چرا لوں _ اگر برا نہ لگے

تمہارے بس میں اگر ہو تو بھول جاؤ مجھے

تمہیں بھلانے میں شاید _ مجھے زمانہ لگے

ہمارے پیار سے جلنے لگی ہے دنیا

دعا کرو _ کسی دشمن کی بد دعا نہ لگے

جو ڈوبنا ہے تو اتنے سکون سے ڈوبو

کہ آس پاس کی لہروں کو بھی پتا نہ لگے

وہ پھول جو مرے دامن سے ہو گئے منسوب

خدا کرے انہیں بازار کی ہوا نہ لگے

نہ جانے کیا ہے کسی کی اداس آنکھوں میں

وہ منہ چھپا کے بھی جائے _ تو بےوفا نہ لگے

تو اِس طرح سے مرے ساتھ بےوفائی کر

کہ ترے بعد _ مجھے کوئی بے وفا نہ لگے

تم آنکھ موند کے پی جاؤ زندگی قیصر

کہ ایک گھونٹ میں ممکن ہے _ بدمزہ نہ لگے

قیصر الجعفری