۔۔۔۔ غزل  ۔۔۔۔۔۔۔

شاعرہ  ۔۔۔۔۔۔۔۔۔۔۔ سامیہ ناز سیمیں

اب کسی رائے شماری  میں نہیں آئیں گے

آپ کے دل کی سواری میں نہیں آئیں گے

رنگ و خوشبو ہمیں لینا ہے فقط فطرت سے

کاغذی  گوٹا  کناری  میں  نہیں  آئیں  گے

معذرت،  آپ کا اخلاص ہے  شک  سے بالا

ہم  مگر  وقت گزاری  میں  نہیں  آئیں گے

آج  کی شام  ذرا ، صَرفِ  نظر  کیجے  گا

پھر کبھی ایسی خُماری میں نہیں آئیں گے

اب کہاں سَینت کے یہ خواب مقفّل رکھوں

آنکھ کی ننّھی  پِٹاری میں نہیں  آئیں  گے

کتنے ہی  داغ  دکھائے بھی  نہیں جا سکتے

کتنے غم  , گریہ و زاری  میں  نہیں آئیں گے

دامنِ  دل  تو  غزل  کا  ہے   کشادہ   لیکن

دُکھ مِرے نغمہ نگاری  میں نہیں  آئیں  گے

سامیہ ناز سیمیں

۔۔۔۔ شاہ ۔۔۔