پانی ہماری صحت کے لیے بہت اہم ہوتا ہے، خاص طور پر گرم موسم میں جسم میں اس سیال کی کمی بہت نقصان دہ ثابت ہوتی ہے۔

مگر اب دریافت کیا گیا ہے کہ کم پانی پینے کو عادت بنانے سے دل کی صحت متاثر ہوسکتی ہے اور مختلف دائمی امراض کا خطرہ بڑھتا ہے۔

برطانیہ کی لیور پول جان مورس یونیورسٹی کی تحقیق میں بتایا گیا کہ روزانہ کی بنیاد پر کم مقدار میں پانی پینے کے عادی افراد میں تناؤ کا باعث بننے والے ہارمون کی سطح بڑھ جاتی ہے، جس سے امراض قلب، ذیابیطس اور ڈپریشن سے متاثر ہونے کا خطرہ بڑھتا ہے۔

تحقیق کے مطابق جو افراد روزانہ ڈیڑھ لیٹر سے کم پانی پیتے ہیں، ان میں تناؤ بڑھانے والے ہارمون کورٹیسول کی سطح دیگر کے مقابلے میں 50 فیصد زیادہ ہوتی ہے۔

تحقیق کے مطابق یہ ہارمون جب زیادہ سرگرم ہوتا ہے تو مختلف امراض سے متاثر ہونے کا خطرہ بڑھتا ہے۔

اس تحقیق کے لیے صحت مند نوجوانوں کے 2 گروپس بنائے گئے۔

ایک گروپ ایسے نوجوانوں کا تھا جو دن بھر میں پانی یا دیگر مشروبات کے ذریعے ڈیڑھ لیٹر سے کم سیال جسم کا حصہ بناتے تھے۔

دوسرے گروپ میں شامل افراد زیادہ مقدار میں پانی کے پینے کے عادی تھے۔

ان دونوں گروپس میں تناؤ کے ردعمل، نیند اور دیگر عناصر کے اثرات کا موازنہ کیا گیا۔

ان افراد کے خون اور پیشاب کے نمونوں میں پانی کی سطح کا جائزہ لیا گیا۔

بعد ازاں انہیں حقیقی دنیا میں تناؤ بڑھانے والے ٹیسٹوں جیسے ملازمت کے فرضی انٹرویو اور دماغی ٹاسک کرنے کے لیے دیے گئے۔

نتائج سے معلوم ہوا کہ کم پانی پینے والے افراد کے جسم کے اندر کورٹیسول کی سطح میں نمایاں اضافہ ہوا۔

محققین نے بتایا کہ اگرچہ کم پانی پینے والے افراد نے پیاس کو رپورٹ نہیں کیا مگر ان کی پیشاب کی رنگت زیادہ گہری ہوگئی جو کہ جسم میں ڈی ہائیڈریشن کی واضح علامت ہے۔

انہوں نے مزید بتایا کہ جسم میں کورٹیسول کی سطح میں اضافے سے طویل المعیاد بنیادوں پر صحت متاثر ہوتی ہے۔

ان کا کہنا تھا کہ جسم میں پانی کی مناسب مقدار تناؤ کو کنٹرول کرنے میں مدد فراہم کرتی ہے۔

اس تحقیق کے نتائج جرنل آف اپلائیڈ فزیولوجی میں شائع ہوئے۔

اس سے قبل مئی 2024 میں امریکا کی پنسلوانیا یونیورسٹی کی تحقیق میں بتایا گیا کہ جسم میں پانی کی معمولی کمی سے بھی وقت گزرنے کے ساتھ آپ کی توجہ مرکوز کرنے کی صلاحیت متاثر ہوتی ہے۔

تحقیق میں دریافت کیا گیا کہ روزمرہ کی سرگرمیوں کے دوران اگر جسم میں پانی کی کمی ہوتی ہے تو چند منٹ کے لیے توجہ مرکوز کرنے کی صلاحیت پر منفی اثرات مرتب ہوتے ہیں۔

ماضی میں ہونے والے تحقیقی رپورٹس میں بتایا گیا تھا کہ ڈی ہائیڈریشن سے خلیات کی صحت اور گردوں کے افعال متاثر ہوتے ہیں جبکہ دائمی امراض اور جلد موت کا خطرہ بڑھ جاتا ہے۔