سفیر پاکستان ممتاز زہرہ بلوچ نے آج سفارت خانے میں منعقدہ ایک تقریب میں ایسوسی ایشن آف پاکستانی فرانکوفون پروفیشنلز (AFFP) سے خطاب کیا۔

پیرس۔ فرانس(ڈیلی روشنی نیوز انٹرنیشنل ۔۔۔۔   رپورٹ۔۔۔ منیر احمد ملک )اپنے خطاب میں سفیر نے پاکستان، فرانس اور وسیع تر فرانکوفون دنیا کے درمیان روابط کو مزید مستحکم بنانے کی اہمیت پر زور دیا۔ انہوں نے کہا کہ پیشہ ور افراد، ماہرینِ تعلیم، کاروباری شخصیات اور سول سوسائٹی کے نمائندے باہمی تعلقات کو فروغ دینے، عوامی سطح پر روابط مضبوط کرنے اور دوطرفہ تعاون کو آگے بڑھانے میں اہم کردار ادا کر سکتے ہیں۔

سفیر نے پیشہ ورانہ روابط اور ثقافتی مکالمے کے فروغ کے لیے ایسوسی ایشن کی کاوشوں کو سراہا۔ انہوں نے پاکستانی کمیونٹی کی بھی تعریف کی جو مقامی جمہوری عمل، بشمول بلدیاتی انتخابات، میں فعال کردار ادا کر رہی ہے اور فرانسیسی معاشرے کے ساتھ ساتھ پاکستان اور فرانس کے درمیان پائیدار دوستی کے فروغ میں مثبت خدمات انجام دے رہی ہے۔۔