جہالت کیا ہے؟

تحریر  ۔۔۔۔۔  محمد شعیب عمر

ہالینڈ(ڈیلی روشنی نیوز انٹرنیشنل ۔۔۔ جہالت کیا ہے؟۔۔۔ تحریر  ۔۔۔۔۔  محمد شعیب عمر)جہالت صرف یہ نہیں کہ انسان کسی بات سے ناواقف ہو؛ اصل جہالت یہ ہے کہ انسان حق کو جانے بغیر اس کے بارے میں یقین قائم کرلے، یا جان لینے کے باوجود حق کو قبول کرنے سے انکار کردے۔ معلومات کی کمی ایک علمی کمزوری ہے، مگر حقیقت سے بے اعتنائی ایک فکری بیماری بن سکتی ہے۔

قرآن نے جہالت کو صرف لاعلمی کے معنی میں نہیں، بلکہ غلط رویے اور حقیقت سے بے شعوری کے مفہوم میں بھی بیان کیا ہے: ﴿أَفَحُكْمَ الْجَاهِلِيَّةِ يَبْغُونَ﴾ — “کیا یہ لوگ جاہلیت کا فیصلہ چاہتے ہیں؟” (المائدہ: 50)

انسان کے پاس بہت سی معلومات ہوسکتی ہیں، مگر اگر وہ دلیل کو تعصب سے، حقیقت کو خواہش سے اور حق کو اپنی پسند سے پرکھتا ہے تو معلومات اسے جہالت سے نہیں نکالتیں۔ علم انسان کو حقیقت تک پہنچاتا ہے، مگر بصیرت اسے حقیقت کے سامنے جھکنا سکھاتی ہے۔

اسی لیے جہالت کا پہلا علاج معلومات نہیں، سوال کرنے کی دیانت، اپنی لاعلمی کا اعتراف، اور حق کو قبول کرنے کی آمادگی ہے۔

جہالت کا سب سے خطرناک دروازہ یہ ہے کہ انسان کو اپنی جہالت کا احساس ہی نہ رہے۔