ہالینڈ(ڈیلی روشنی نیوز انٹرنیشنل )روسی مسلمان خاتون ایمان پورخووا، جنہوں نے قرآنِ کریم کے معانی کو منظوم انداز میں روسی زبان میں منتقل کیا
روس کی مترجمہ اور مسلم دانشور ایمان ویلریا پورخووا نے قرآنِ کریم کے معانی کو روسی زبان میں منظوم اور قافیہ دار اسلوب میں پیش کرکے علمی دنیا میں اپنی پہچان بنائی۔ 1940ء میں روس کے شہر اوختا میں پیدا ہونے والی ویلریا نے 1980ء کی دہائی میں اسلام قبول کیا اور ایمان نام اختیار کیا۔
دمشق میں قیام کے دوران قرآنِ کریم کے مطالعے سے متاثر ہوکر انہوں نے اس کے معانی روسی زبان میں منتقل کرنے کا کام شروع کیا، جو 1991ء میں مکمل ہوا۔ ان کا ترجمہ 1993ء میں شائع ہوا، جس کی تیاری میں انہوں نے ابنِ کثیر، امام طبری اور امام قرطبی سمیت معروف مفسرین کی تفاسیر سے استفادہ کیا۔
ان کے ترجمے کو روسی زبان بولنے والے قارئین میں پذیرائی ملی، تاہم بعض محققین نے اس کے چند تفسیری انتخاب پر سوالات بھی اٹھائے۔ ایمان پورخووا 2 ستمبر 2019ء کو 79 برس کی عمر میں ماسکو میں انتقال کر گئیں۔ انہیں روسی زبان میں قرآنِ کریم کے معانی کا ترجمہ کرنے والی پہلی مسلمان خاتون کے طور پر یاد کیا جاتا ہے۔
